Në Qendrën e Mjekësisë Familjare në Prishtinë u përurua Dhoma e promovimit dhe edukimit shëndetësor, e dedikuar për parandalimin dhe menaxhimin e sëmundjeve jongjitëse si diabeti, hipertensioni, sëmundjet kardiovaskulare dhe obeziteti.
Drejtori i Shëndetësisë në Komunën e Prishtinës, Izet Sadiku, theksoi rëndësinë e kësaj dhome si hapësirë edukimi, motivimi dhe mbështetje për qytetarët, raporton EO.
“Në një kohë kur sëmundjet jongjitëse, si diabeti, hipertensioni, sëmundjet kardiovaskulare dhe obeziteti, po përhapen me ritme të larta, nevojitet një qasje më gjithpërfshirëse për të ndikuar në mënyrë pozitive tek sjelljet shëndetësore të popullatës. Kjo dhomë nuk është thjesht një hapësirë fizike. Ajo është një qendër e dijes, motivimit dhe mbështetjes për çdo individ që dëshiron të përmirësoje jetën e tij”, tha Sadiku.
Ai tha se qëllimi i saj është të edukojë dhe fuqizojë qytetarët që të kuptojnë më mirë sëmundjet jongjitëse, të njohin faktorët e rrezikut si dhe të marrin masa për parandalimin dhe menaxhimin e tyre.
“Nëpërmjet sesioneve edukative, këshillimeve profesionale, aktiviteteve praktike dhe materialeve informuese, kjo dhomë do të shërbejë si urë lidhëse midis sistemit shëndetësor dhe komunitetit. Të gjithë e dimë se parandalimi është më i mirë se trajtimi dhe kjo dhomë është një hap i madh në drejtimin e duhur. Ajo fuqizon individin dhe mbështet komunitetin në përballjen me sfidat shëndetësore të shekullit XXI. Ky shërbim nuk dot të bëhej pa përkrahjen e projektit të AQH-së dhe përkrahjes se popullit të Zvicrës”, tha Sadiku.
Nga Agjencia për Zhvillim dhe Bashkëpunim e Zvicrës thanë se përmes këtij bashkëpunimi synohet forcimi i kujdesit mjekësor, me theks të veçantë në trajtimin dhe parandalimin e sëmundjeve jongjitëse, të cilat përbëjnë një sfidë të madhe edhe për Kosovën
“Çka është më e rëndësishme stafi shëndetësor që bënë përpjekje për të kryer shërbime të pacientëve. Çështja që është bërë në vazhdimësi të projektit i është mjaft e rëndësishme që ka ndërlidhur shumë çeshtje në Kosovë. Jemi munduar ta fuqizojmë kujdesin mjekësor, vecanërisht me sëmundjet jongjitëse. Në të kaluarën është e rendësishme që qytetarët të njoftohen për sëmundjet jongjitëse dhe si t’i trajtojnë ata”.