Kryeministri Ramush Haradinaj dhe ministri i shëndetësisë, Uran Ismaili, kanë vizituar për herë të tretë QKUK-në brenda pak më shumë se 100 ditë qeverisje.
Dy zyrtarët e lartë të qeverisë janë pritur nga drejtori i SHSKUK-së Basri Sejdiu dhe Bordi Drejtues.
Sejdiu ka thënë se është kënaqësi me pa përkrahjen maksimale nga Qeveria dhe MSH.
“Tani e tutje po fillojmë një epokë të re që pacientët po e ndiejnë dorën e shtetit dhe do të ketë vend ku do ta gjejnë trajtimin adekuat”, ka deklaruar Sejdiu.
Kryeministri tha se erdhi t’i shoh ndryshimet që janë arritur brenda këtyre 100 ditëve, si dhe problemet të cilat duhet të zgjidhen vitin e kaluar.
Haradinaj po ashtu ka thënë se do të ketë përgjegjësi, nëse shëndetësia nuk ndërron për të mirë.
“Do të jemi bashkë vitin që vjen. Edhe unë, edhe drejtori varemi nga treguesit e ndryshimeve pozitive. Mos me qenë mirë ne të gjithë duhet të japim përgjegjësi”, ka deklaruar Haradinaj.
Ai shtoi se shqetësimet më të mëdha janë furnizimi me barna, listat e pritjes për trajtim si dhe pritjet e gjata nga kallaballëku nëpër klinika.
Për ndryshime në të mirë të shëndetësisë është zotuar edhe ministri Uran Ismaili.
Ai tha se pas diskutimeve për problemet me të cilat përballet SHSKUK-ja, në vitin 2018 pritet të eliminohen.
“Vitin e ardhshëm duhet t’i thjeshtojmë këto probleme në mënyrë që qytetarët të kenë barna, të mos presin në rend dhe kushtet të mos jenë aq drastike në krahasim me vendet që nuk janë shumë larg nesh”, ka deklaruar Ismaili. /Gazeta Shneta/