Kryesuesit dhe anëtarët e grupeve punuese për hartim të udhërrëfyesve dhe protokolleve klinike nënshkruan të mërkurën në Ministri të Shëndetësisë Deklaratën e konfliktit të interesit, në mënyrë që puna e tyre në hartimin e këtyre dokumenteve të jetë profesionale dhe e pandikuar nga interesa të ndryshme të mundshme.
Në këtë takim, mori pjesë edhe Ministri i Shëndetësisë Imet Rrahmani, i cili vlerësoi se hartimi i udhërrëfyesve dhe protokolleve klinike është një proces shumë i rëndësishëm që do të mbështetet nga MSh-ja, ndërsa inkurajoi kryesuesit dhe anëtarët e Grupeve punuese që punën e tyre të përfundojnë brenda afatit të paraparë, sipas vendimeve të nënshkruara nga ai.
Pas hartimit të tre udhërrëfyesve të parë nga fusha e shëndetit të nënës dhe fëmijës, punën e kanë filluar pesë grupe të tjera të cilat do të punojnë në hartimin e udhërrëfyesve dhe protokolleve klinike për: Hipertension arterial; Astmë bronkiale; Transport neonatal; Diabet; dhe Këshillim e testim vullnetar.
Puna e këtyre grupeve është e bazuar në Udhëzimin Administrativ 08/2015 për udhërrëfyes dhe protokolle klinike. /Gazeta Shneta/