Deputeti i PDK-së Bekim Haxhiu, i njohur ndryshe si Kamishi, ka kritikuar ashpër mjekët dhe ministrin e Shëndetësisë Uran Ismaili.
Për këtë të fundit ka thënë se nuk ka punuar sa duhet pasi ka lënë spitalet pa barna me arsyetimin se është duke bërë revidimin e Listës Esenciale. “Ne si Kuvend e kemi rritur buxhetin për barna për vitin 2018, dhe pritjet tona kanë qenë që të mos ketë më telashe me barna. Mungesat janë të mëdha. Ndoshta dikujt në Ministrinë e Shëndetësisë nuk i ngutet sepse përfiton për vete, por pacientët po pësojnë”, ka thënë Kamishi në KTV, transmeton Gazeta Shneta.
Ai ka folur edhe për grevën e mjekëve ku kanë kërkuar rritje pagash. Kamishi konsideron se kërkesat e tyre janë të drejta, por ka insistuar se pagat duhet të bëhen në bazë të performancës.
Haxhiu, i cili mban titullin e doktorit të shkencave në mjekësi, ka thënë tutje se disa mjekë rrinë nëpër kafe dhe merren me llafe e disa të tjerë janë mantelbardhë që merren me biznese.
“Nuk mund të paguhet njësoj si një kirurg që bën disa operacione në ditë, si dikush që rri në kafe dhe merr për gojë kolegët e vet. Besoj se shumica janë të ndershëm por ka edhe biznesmen me mantele të bardha. Shoqëria jonë dhe odat duhet t’i identifikojë dhe t’i dënojë këta mjekë dhe të vlerësojë ata që punojnë”, ka thënë Haxhiu. /Gazeta Shneta/