Nga 15 qershori mbi 1200 mantelbardhë nuk do të vazhdojnë më punën në institucionet shëndetësore në vend, pasi që Ministria e Shëndetësisë nuk i ka vazhduar kontratat e tyre.
Ministria e Shëndetësisë në shtator të vitit të kaluar pati angazhuar mbi 1200 profesionistë shëndetësorë për shkak të pandemisë dhe për procedura të vaksinimit kundër coronavirusit.
Largimin e stafit mbështetës nga puna, anëtari i Sindikatë së Infermierëve të Kosovës, Enlirat Duraku, e konsideronë goditje të radhës ndaj infermierëve pasi që, sipas tij, me largimin e infermierëve do të mbi ngarkohen infermierët aktual.
“Është edhe turp dhe dëm i madh të largohen nga puna profesionist të cilat tash e 9 muaj veqëse janë aftësuar dhe të gatshëm që veprimtarinë infermierore t’a zhvillojnë të pavarur”, vlerëson ai.
Një situatë të tillë Duraku e ndërlidh edhe me ofrimin e shërbimeve ndaj pacientëve, pasi që, ai thotë, se një infermierë kujdeset për 20 apao 30 pacientë ndërsa thekson se për Qeverinë “si duket shërbimet cilësore nuk janë prioritet”.
Anëtari i Sindikatës së Infermierëve gjithashtu thotë se shumica e stafit infermierorë janë të prekur nga stresi në punë e veçanarisht ata të cilët kanë punuar gjatë pandemisë COVID-19.
“Në anën tjetër përjashtimit nga puna të këtyre profesionistëve i bashkangjitet edhe diskriminimi dhe përjashtimi edhe nga pakot emergjente, e që konsideroj si kominiteti me produktiv në vend do duhej që të parët të përfshiheshin në këto pako”, shprehet ai, duke bërë të ditur se infermierëve nuk i është ekzekutuar paga shtesë prej 100 euro të dhënë nga Qeveria e Kosovës për disa kategori në vend, duke përfshirë edhe stafin tjetër shëndetësorë.
“Mos të harrojmë që këta profesionist nuk kishin as beneficionet tjera siç janë pagesa e punës gjatë natës, pagesa e punës gjatë vikendeve dhe festave, pagesa e orëve shtesë dhe pagesa e rrezikshmerisë në punë, praktikisht ishin të trajtuar si qytetar të dorës së dytë”, nënvizon Duraku.
Vendim të padrejtë e mosmirënjohës po e cilëson Specialisti i Mjekësisë Familjare në Qendrën Kryesore të Mjekësisë Familjare në Ferizaj, Urim Çerkini.
“Ky staf i shkolluar e i trajnuar, disa prej tyre edhe me përvojë dhjetë vjeçare në shërbim, u larguan padrejtësisht nga puna. Ç’është më e rënda, kjo ishte një mosmirënjohje ndaj vetëmohimit deri në përballje me vdekjen të kolegëve tanë të cilët për asnjë çast nuk ngurruan në çasjen profesionale të secilit pacient, qoftë ambulantor, i shtrirë në spital, por edhe në vizita shtëpiake”, shprehet specialisti.
Mungesa e barnave e materialeve shpenzuese nëpër institucionet shëndetësore në vend është mjaft e theksuar, për të cilën Çerikini thotë se me një situatë të tillë janë ballafaquar edhe stafi mbështetës i angazhuar gjatë pandemisë.
“Shumë shpesh ishin të përballur edhe me mungesë absurde të mjeteve të punës si, maska, dorëza, rroba mbrojtëse e pulsoxymetra, të domosdoshëm gjatë Pandemisë, por jo vetëm. Për të qënë absurdi edhe më i skajshëm, në Institucionet Shëndetësore, më shumë kemi punësime të punëtorëve ndihmës se sa të Mjekëve e Infermierëve”, thekson ai në një prononcim për Gazetën Shneta.
Stafi mbështetës i angazhuar gjatë pandemisë gjatë nëntë muajve, sa kanë qenë të punësuar me kontratë nga Ministria e Shëndetësisë janë ballafaqur edhe me vonesë të pagave mujore e mos pagesë të kujdestarive të tyre, për të cilët disa herë kanë protestuar para ministrisë./ Gazeta Shneta/