Pas sinjalizimit nga një qytetar për dyshime se ilaçet për kancer po vidhen nga QKUK-ja e po shiten pa banderola nëpër barnatoret afër spitalit, ekipi i emisionit nisi punën në terren.
E kamufluar si paciente, gazetarja e KIKS-it vizitoi disa nga barnatoret afër spitalit, në kërkim të ilaçit “Albumin”, pa një recetë të mjekut.
Ilaçi u gjet në katër barnatore, dhe në tri prej tyre ky bar ishte pa banderolë.
Për më tepër, në asnjërën prej tyre çmimi nuk ishte i njëjtë.
Në barnatoren e dytë, farmacistja u arsyetua se banderola i mungon për shkak se ilaçi vjen i paketuar me shumicë.
Se farmacistët janë në dijeni dhe të involvuar në këtë veprimtari e vërtetoi kuponi fiskal që farmacistja ia dha KIKS-it. Ndonëse çmimi në kupon ishte 26 euro, aq sa kushtoi ilaçi, emri i produktit ndryshonte.
Me një kërkim në internet, KIKS-i zbuloi se shifra e shkruar në faturë me emrin “Humana” ishte qumësht formulë për fëmijë e jo “Albumin Human”, ilaçin të cilin e bleu gazetarja.
Ajo çka vuri re ekipi i emisionit ishte edhe ndryshimi në çmim: në asnjërën nga tri barnatoret ku ky ilaç u gjet pa banderolë, nuk kishte çmimin e njëjtë. Çmimet varionin nga 25 deri në 28 euro.
Në barnatoren e tretë, farmacistja i tha KIKS-it se barnat pa banderolë, vendi i origjinës së të cilëve ishte Beogradi, i marrin në depo, pa specifikuar për cilën depo e ka fjalën.
Në tentim për ta bindur gazetaren që të blejë ilaçin pa banderolë, farmacistja tha se nuk ka asnjë ndryshim mes atij me dhe pa banderolë.
KIKS-i gjeti “Albumin” me banderolë në barnatoren e katërt, ilaç i cili iu dha pa paraqitur fare recetën e mjekut. Me banderolë ky ilaç kushtonte 32 euro. /Klankosova.tv