Në një ngjarje të rëndësishme për komunitetin, u përurua zyra e re e Qendrës së Mjekësisë Familjare në Shupkovc, pas një procesi të plotë renovimi të objektit, financuar nga buxheti i Komunës së Mitrovicës.
Kryetari i komunës, Bedri Hamza, dhe zyrtarë të tjerë të lartë të komunës, si nënkryetari Arian Tahiri, drejtori i Drejtorisë për Shëndetësi, Fahri Shabani, si dhe shefja e kësaj QMF-je, Dr. Mevlyde Smakiqi, bashkë me përfaqësues të tjerë të komunës dhe banorët e zonës, morën pjesë në këtë ngjarje.
Kryetari Hamza shprehu kënaqësinë për hapjen e kësaj qendre në fund të vitit, duke vlerësuar veçanërisht investimet në sektorin e shëndetësisë. Ai shtoi se kjo është një vijë e investimeve të rëndësishme, duke prezantuar planet për finalizimin e disa qendrave të tjera të shëndetit në vitin e ardhshëm.
Nga ana tjetër, drejtori i Shëndetësisë, Fahri Shabani, theksoi se kjo qendër e rinovuar do të ofrojë shërbime shëndetësore në përputhje me standardet më të larta bashkëkohore, duke siguruar kujdes cilësor dhe të përmirësuar për banorët e kësaj zone.
Ky hap paraqet një angazhim të vazhdueshëm për të përmirësuar infrastrukturën shëndetësore dhe për të ofruar shërbime më të mira në kujdesin për shëndetin e komunitetit në Mitrovicë.
