Ish-presidenti i Shteteve të Bashkuara, Joe Biden, është diagnostikuar me një formë agresive të kancerit të prostatës, ka njoftuar zyra e tij të dielën.
Sipas një deklarate zyrtare, diagnoza u bë të premten pasi Biden iu nënshtrua një kontrolli mjekësor për shkak të simptomave urinare në rritje. Mjekët zbuluan një nodul në prostatë, i cili pas analizave rezultoi të jetë kancer me një rezultat Gleason 9 (Grupi i Gradës 5), që tregon një formë shumë agresive të sëmundjes.
Kanceri gjithashtu është përhapur në kocka (metastazë).
“Presidenti dhe familja e tij janë duke shqyrtuar opsionet e mundshme të trajtimit me ekipin mjekësor”,thuhet në deklaratë.
Lajmi vjen vetëm pak muaj pas përfundimit të mandatit të Biden si President i SHBA-së, më 20 janar 2025.