Tre ish-zyrtarë të qeverisë franceze që mbikëqyrën fazën e hershme të pandemisë COVID-19 u liruan nga akuzat se e keqmenaxhuan krizën shëndetësore, tha të hënën njëri prej të akuzuarve.
Vendimi vjen pesë vjet pasi një gjykatë e lartë në Francë hapi një hetim ndaj ish-kryeministrit Édouard Philippe, i cili dha dorëheqjen në korrik 2020, si dhe ish-ministrave të shëndetësisë Agnès Buzyn dhe Olivier Véran. Ata u akuzuan për “dështimin në luftimin e katastrofës”.
Véran e konfirmoi vendimin në një postim në platformën e mediave sociale X.
“Pas vitesh të tëra procedurash, hetimesh, thirrjesh në gjyq dhe padish publike, drejtësia ka folur”, shkroi ai. “Ne nuk kemi kryer as faj dhe as dështim të qëllimshëm”.
Véran zëvendësoi Buzyn si ministre e shëndetësisë në shkurt të vitit 2020, kur ajo dha dorëheqjen për të kandiduar për kryebashkiake të Parisit, shkruan Euronews, transmeton Gazeta Shneta.
Gjykata e Drejtësisë e Republikës, e vetmja gjykatë franceze që mund të hetojë zyrtarët qeveritarë ndërsa janë ende në detyrë, e hapi çështjen në korrik 2020 pasi mori dhjetëra ankesa nga mjekë, pacientë, zbatues të ligjit dhe të tjerë në lidhje me reagimin e tyre ndaj pandemisë.
Ndër ankesat e tyre kryesore ishin mungesa e maskave dhe pajisjeve të tjera, si dhe vendimi për të mbajtur zgjedhjet komunale më 15 mars 2020, vetëm pak ditë para se Presidenti francez Emmanuel Macron të shpallte masa në të gjithë vendin për të parandaluar përhapjen e virusit.
Buzyn ishte akuzuar gjithashtu për rrezikim të jetës së të tjerëve në shtator 2021, por Gjykata e Kasacionit e Francës e hodhi poshtë akuzën në janar 2023.
Në postimin e tij në X, Véran tha se ishte përballur me kërcënime me vdekje dhe dezinformata online gjatë hetimit për “skandalin hipotetik”./Gazeta Shneta/