Ministri i Shëndetësisë Uran Ismaili ka thënë se nesër do të votohet ligji për pagat, i cili parasheh dyfishim të rrogave për mjekët.
Ai iu ka bërë thirrje të gjithë punëtorëve shëndetësorë, përfshirë kirurgët të cilët janë në grevë, që ta përkrahin këtë ligj.
Postimi i plotë i Ismailit:
Nesër votohet ligji që vulosë rritjen e pagave për gjithë sektorin e shëndetësisë. Kemi punuar gjatë që të kemi një projektligj që rritë dinjitetin e mjekëve tanë.
Çdo përpjekje për të penguar votimin e ligjit e kthen sistemin e shëndetësisë në një gjendje ku mjekët ikin dhe pacientët nuk marrin kujdesin e duhur shëndetësor.
Rritja e pagave, përpos që siguron mirëqenie për mjekët dhe infermierët tanë, na mundëson të fokusohemi vetëm tek pacienti.
Ftoj të gjithë akterët dhe profesionistët shëndetësorë të mbështesin ligjin për të tejkaluar një padrejtësi të madhe që i është bërë sektorit të shëndetësisë për dhjetëra vite!