Ministri i Shëndetësisë, Uran Ismaili, ka njoftuar se ka kërkuar propozimet për anëtarë të Bordit të Fondit të Sigurimeve Shëndetësore.
Ismaili ka deklaruar se këto propozimet do të dërohen në Qeveri më së largu deri më 12 mars për miratim.
Ai është zotuar se Fondi do të funksionalizohet brenda 2 viteve të mandatit të tij, transmeton Gazeta Shneta.
Postimi i tij i plotë në Facebook:
Në kuadër të angazhimit tim, që sa më parë ta funksionalizoj Fondin e Sigurimeve Shëndetësore, sot edhe zyrtarisht u kam dërguar kërkesë të gjithë akterëve të përcaktuar me ligj, për të propozuar emrat e tyre që do të jenë pjesë e bordit të këtij Fondi.
Porsa të marr propozimet, më së largu më 12 mars, unë do t’i dërgoj emrat për miratim në Qeveri.
Bordi i Fondit të Sigurimeve Shëndetësore, si organi më i lartë vendimmarrës, do të jetë përgjegjës të mbikëqyrë veprimtarinë dhe ligjshmërinë e punëve të Fondit.
Është detyrë e imja si ministër që të mbroj qytetarët nga varfërimi për shkak të shpenzimeve në shërbime shëndetësore, andaj themelimi i këtij Bordi na ofron një hap më shumë drejt arritjes së këtij qëllimi.
Brenda dy vitesh të këtij mandati, edhe qytetarët e Kosovës do të jenë të mbuluar nga sigurimet shëndetësore.