Ministri i Shëndetësisë në Kosovë, Uran Ismaili, nuk i përkrah mjekët dhe infermierët sikurse e bën homologia e tij në Shqipëri, Ogerta Manastirliu.
Manastirliu, e cila mban titullin Doktor Shkence në Kimi analitike dhe Mjedis, i përdor shumë shpesh rrjetet sociale për të promovuar punën e saj. Por përdallim nga Ismaili i cili poashtu poston shpesh në Facebook duke promovuar punën e tij, Manastirliu përkrah mjaft shumë punën e mjekëve dhe infermierëve duke shprehur mirënjohje publike ndaj tyre, shkruan Gazeta Shneta.
“Shërbimi i obsetrikë-gjinekologjisë në spitalin e #Peqinit është i lidhur pashmangshmërisht me dr. Burbuqe Ajazin, e cila i shërben prej 41 vitesh të kësaj zone. Për dr. Burbuqen, mjekësia është një profesion me të cilin ka lidhur jetën që prej moshës 14-vjeçare, kur nisi të studiojë në shkollën Mjekësore në Vlorë. Nuk e ka ndalur asnjë ditë punën dhe sot ruan të njëjtin pasion për profesionin e saj”, është vetëm një nga postimet e shpeshta të Manstirliut për mjekët.
“Me tetë mjekët e rinj që i shtohen ekipit të spitalit rajonal Shkodër pas përfundimit të ciklit të specializimit 4-vjeçar. Punë të mbarë dr. Ervini, dr. Ersida, dr. Urimi, dr. Iva, dr. Kleva, dr. Dorjani, dr. Ertimisa dhe dr. Eltoni!”, ka shkruar ministrja në një postim tjetër.
Këtë nuk e bën Ismaili në faqen zyrtare të tij në Facebook. Përkundrazi, ai e ka përdorur këtë rrjet social disa herë për t’i kritikuar ashpër mjekët apo edhe për të kërkuar masa ndaj tyre publikisht. /Gazeta Shneta/