Si pasojë e një aksidenti rrugor në Gjakovë, ka vdekur përfaqësuesi i Kosovës në basketboll, Gazmend Sinani.
Me këtë rast, federata e Basketbollit e Kosovës me pikëllim të thellë njofton mbarë opinionin për këtë ngjarje tragjike që i ka ndodhur basketbollit në veçanti dhe sportit në përgjithësi, e që ka ndodhur në orët e hershme të mëngjesit të së shtunës. Ndërsa së bashku me Sinanin janë lënduar edhe Granit dhe Fisnik Rugova, Altin Morina si dhe fizioterapeuti i reprezentacionit Kujtim Shala.
“Federata e Basketbollit e Kosovës shpreh ngushëllimet e përzemërta familjes Sinani dhe miqve të Gazmendit për këtë humbje të pakompensueshme”, thuhet në njoftim të Federatës.
Sinani karrierën e tij e vazhdoi në Turqi, ku ishte pjesë e akademisë së Fenerbahçes pasi kaloi grupmoshat e reja në kryeqytet. Derisa kujtojmë se ai ka luajtuar për ekipe si Sigal Prishtina, Bashkimin e Prizrenit si dhe Rahovecin.
Sinani në edicionin 2017/2018 luajti në Angli, derisa ishte edhe anëtar i kombëtares së basketbollit të Kosovës. Në njoftimin e FBK-së ndër të tjerash thuhet: Me humbjen e tij, Kosova ka humbur një prej basketbollistëve më të mirë të gjeneratës, kombëtarja ka humbur njërin prej basketbollistëve më të vlefshëm dhe më luftarak. Angazhimi i tij gjatë përgatitjeve për ndeshjet e qershorit ka qenë inspirim dhe motivim për bashkëlojtarët, kurse qasja e tij profesionale dhe shpirti luftarak do të mbeten në kujtim të secilit adhurues të basketbollit.
Derisa, me këtë lajm i shokuar ka mbetur edhe ministri i Shëndetësisë Uran Ismaili, i cili në një postim në Facebook ka shprehur ngushëllimet e tij familjarëve si dhe gjithë bashkëlojtarëve.
‘’I shokuar me vdekjen e një prej basketbollistëve më të mirë të gjeneratës së përfaqësueses së Kosovës, Gazmend Sinanit, i cili humbi jetën si pasojë e një aksidenti rrugor që ka ndodhur sot, në Gjakovë. 27 vjeçari kishte mbrojtur për shumë vite ngjyrat e Prishtinës duke fituar disa tituj kampioni. Ngushëllimet më të sinqerta familjes, miqve dhe bashkëlojtarëve për humbjen e madhe’’, shkruan Ismaili./Gazeta Shneta/