Qeveria e Kanadasë ka njoftuar se do të ndalojë përkohësisht hyrjen në vend të çdo shtetasi të huaj që ka qëndruar në Republikën Demokratike të Kongos gjatë 21 ditëve të fundit, si pjesë e masave të reja kufitare për të parandaluar përhapjen e virusit Ebola.
Sipas burimit Reuters, vendimi bie ndesh me rekomandimet e Organizatës Botërore të Shëndetësisë (OBSH), e cila këshillon që të mos vendosen kufizime për udhëtimet apo tregtinë me Kongon.
OBSH-ja, thotë se masa të tilla krijojnë stigmatizim ndaj njerëzve nga zonat e prekura dhe mund ta bëjnë më të vështirë kontrollin e epidemive. Organizata vlerëson se rreziku i përhapjes ndërkombëtare të shpërthimit në Kongo mbetet i ulët, transmeton Gazeta Shneta.
Virusi Ebola transmetohet kryesisht përmes kontaktit të drejtpërdrejtë me lëngjet trupore të një personi të infektuar. Deri më 15 korrik, Kongo kishte raportuar mbi 2.100 raste të Ebolës, përfshirë 828 viktima.
Agjencia e Shëndetit Publik të Kanadasë thotë se kufizimi i hyrjes për shtetasit e huaj që kanë qenë në Kongo gjatë 21 ditëve të fundit mund të zvogëlojë rreziqet për shëndetin publik në vend.
Masat hyjnë në fuqi më 20 korrik, në orën 23:59 sipas kohës lindore të Kanadasë. Më herët, Kanadaja kishte pezulluar dokumentet e emigracionit për banorët e Kongos, Ugandës dhe Sudanit të Jugut.
Deri tani nuk është konfirmuar asnjë rast i Ebolës në Sudanin e Jugut, ndërsa Uganda nuk ka raportuar raste të reja që nga muaji i kaluar.
Edhe Qendra Evropiane për Parandalimin dhe Kontrollin e Sëmundjeve (ECDC) është shprehur kundër ndalimeve të udhëtimit për personat që vijnë nga Kongo, duke vlerësuar se ato mund të pengojnë ndihmën humanitare dhe kanë efekt të kufizuar në frenimin e përhapjes së sëmundjes. /Gazeta Shneta/