Një grup i kardiologëve të Klinikës së Kardiologjisë në QKUK, po kërkojnë shkarkimin e drejtorit Imri Jashari. Kjo kërkesë e tyre vjen vetëm disa ditë pas rikthimit në punë të kardiologut Gani Bajraktari nga Komisioni Disiplinor
Grupi i kardiologëve Artan Ahmeti, Jahir Shala, Banush Gashi, Nehat Rexhepi, Ibadete Bytyçi, Hamza Selmani, Edmond Haliti, Arlind Batalli, Afrim Poniku, Lulzim Kamberi dhe Gani Bajraktari, i kanë dërguar një letër menaxhmentit dhe Bordit Drejtues të SHSKUK-së me kërkesën për shkarkimin e Jasharit, shkruan Gazeta Shneta.
Kardiologët kanë thënë se pas përpjekjeve të brendshme për të tejkaluar problemet dhe vështirësitë, janë detyruar t’iu drejtohen atyre me kërkesën për shkarkim duke rënditur 12 arsye ku Jashari akuzohet për keqmenaxhim, monopolizim të shërbimeve, nxitje të konfliktit, etj.
Sipas kardiologëve, Jashari me 70 për qind të stafit të klinikës flet vetëm zyrtarisht dhe nuk ka marrëdhënie kolegiale. “Duplifikimi i pozitës menaxheriale në shërbime të ndjeshme siç është ai i elektrostimulimit dhe aritmologjisë, të cilën e ka lënë pa shef prej gati 2 vitesh, me qëllim të monopolizimit të këtij shërbimi, shpërfilljen e listës së pritjes, hartimin personalisht të planit operator dhe moslejimin e angazhimit të kuadrove të reja”, thuhet në pikën 3 të këtij dokumenti të nënshkruar nga kardiologët.
Tutje ata e akuzojnë Jasharin për emërimin e dy shefave pa kritere statutare, si dhe lënien e disa njësive tjera pa shefa për disa vite.
“Ndërrimet e shpeshta të vendeve të punës pa asnjë arsye, në mënyrë tekanjoze e selektive, nëpër reparte e kabinete, kanë krijuar pakënaqësi të panevojshme, nxitje të konflikteve dhe demotivim në punë”.
Jashari poashtu akuzohet se ka shqiptuar dënime të panumërta me shkrim dhe me gojë ndaj shumicës së stafit me dhe pa arsye, dhe poashtu ka ndërmarr masa duke i pezulluar mjekët përkohësisht nga puna në një kabinet ose moslejim i pjesëmarrjes në aktivitete profesionale.
Më poshtë e gjeni kërkesën e plotë të kardiologëve të dërguar në drejtorinë e përgjithshme. /Gazeta Shneta/