Kirurgu i fëmijëve dhe anëtari i Lëvizjes Vetëvendosje Dr. Baton Kelmendi ka folur dje në një konferencë për media për gjendjen në shëndetësi së bashku me Dr. Arben Vitia.
Kelmendi në fjalën e tij ka adresuar disa kritika për menaxhmentin aktual të Qendrës Klinike Universitare të Kosovës. Ai ka folur për mungesat e shumta të barnave dhe materialeve të domosdoshme dhe elementare për funksionimin e shërbimeve ndaj pacientëve, shkruan Gazeta Shneta.
“Ka muaj që mungojnë penjtë në sallë (Vicryl 2.0, Vicryl 5.0 etj), si dhe elektrokauteri në sallën e 2 të emergjencës është në defekt. Praktikisht vetëm një sallë është e gatshme për operacione. Radhët e panevojshme për operacione urgjente e kanë edhe këtë si shkak. Merreni me mend nëse bëhet fjalë për ndonjë pacient që duhet ti nënshtrohet operacionit brenda minutave e salla është e zënë. Pra, gjithë QKUK me vetëm një sallë funksionale për operime”, ka deklaruar Kelmendi.
Ai ka kritikuar drejtorinë e SHSKUK-së për të cilën ka thënë se më shumë po i përngjan zyrës lokale të Partisë Demokratike të Kosovës, nga e cila është udhëhequr shëndetësia për këto dy vite.
“Drejtoria dhe bordi ka bërë partizim brutal në SHSKUK. Ky fenomen ka mbërritur kulmin aktualisht. Një ndër arsyet e dështimeve të shumta është mungesa e plotë e kritereve profesionale dhe etike të këtyre personazheve. Ndërtesa e administratës së SHSKUK më shumë i përngjan zyrës lokale të PDK-së për lagjen e spitalit se sa një institucioni përgjegjës për të vetmen Qendër Klinike Universitare në vend, dhe të gjitha spitaleve rajonale të Kosoves”, ka deklaruar Kelmendi.
Ai ka kërkuar sqarime se nga është planifikuar të sillet aparati i dytë ekstrakorporal, për operacionet kardiokirurgjike. “Aparati i ri ka pasur defekt. Rastësia e solli, që pa filluar operacioni të ndodhë defekti. A servisohen me rregull aparatet nga kompanitë e specializuara për to?”, ka thënë Kelmendi. /Gazeta Shneta/