Kirurgu i njohur kosovar Dr. Halil Krasniqi i cili drejton një klinikë në Gjermani, ka dhuruar dy autoambulanca në qytetin e Pejës, një në QMF dhe një në Spitalin e Përgjithshëm.
“Jam shumë i lumtur që pas një angazhimi, arrita të siguroj këtë mjet shumë të nevojshëm për qytetin e Pejës, i cili shpresoj shumë të ju shërbejë qytetarëve të atij rajoni. Unë do të vazhdoj të angazhohem të ndihmojë të gjithë shqiptarëve në të gjitha format e mundshme, e veçanarisht në fushën e mjekësisë”, ka deklaruar Krasniqi me rastin e dorëzimit të autoambulancës në QMF, transmeton Gazeta Shneta.
Ndërkaq gjatë ditës së sotme Krasniqi ka shprehur gatishmërinë e tij për të kontribuuar edhe me punën e tij profesionale në Spitalin e Pejës.
Njoftimi i plotë nga Spitali i Përgjithshëm në Pejë:
Dr. Halil Krasniqi dhuroj një Autoambulancë Spitalit të Përgjithshëm në Pejë
Dashuria për vendlindjen dhe njohja e nevojave të pacientëve si profesionist kanë bërë padyshim që Dr.Halil Krasniqi të sjellë një Autoambulancë si donacion për Spitalin e Përgjithshëm në Pejë. Dr.Halil Krasniqi është Shef I klinikës së Kirurgjisë vaskulare në Spitalin St.Johanes -Hospital, në qytetin Verel i Regjionit Friesland në Gjermani.
Në ceremoninë e organizuar lidhur me këtë donacion e në të cilën përveç stafit drejtues të Institucionit tonë, zyrtarëve nga Komuna, Dr.Halil Krasniqit morri pjesë edhe ish presidenti i vendit Z.Fatmir Sejdiu. Drejtori Ekzekutiv Dr.Skender Dreshaj në emër të Spitalit të Përgjithshëm në Pejë ka falenderuar Dr.Halil Krasniqin për këtë donacion duke theksuar se nevoja për Autoambulancë ishte e madhe ndërsa që edhe më të madhe këtë donacion e bënë pasi që një Mjek që ka bërë emër në Gjermani po kujdesët për Spitalin e vendlindjes së tij.
Dr. Halil Krasniqi ka theksuar se kjo Autoambulancë ka qenë në shërbim të Kryqit të Kuq deri më tani, dhe unë ndihem i lumtur që kam mundur të ndihmoj banorët e qytetit tim të lindjes me këtë donacion. Dr.Halil Krasniqi ka theksuar se ndihma për Spitalin e përgjithshëm në Pejë do të ketë edhe në të ardhmen pasi që është i gatshëm që periodikisht të vije dhe të kryen shërbime shëndetësore për pacientë.
Në fjalën e tij Ish presidenti z.Fatmir Sejdiu ka folur për Dr.Halil Krasniqin që është shembull më i mirë i humanizmit, dhe që neve na bënë krenar me punën dhe sukseset e tij në Gjermani por edhe me përkrahjen që bënë për Kosovën.