“Koha është tru” është slogani i një fushate që ka filluar me trajnime të stafit mjekësor të Urgjencës së Prishtinës. Trajnimet po mbahen me qëllim stafi mjekësor të njihen me simptomat e sulmit në tru, dhe pacientët me indikacione të dërgohen direkt në Klinikën e Neurologjisë në QKUK për të marr trajtimin me terapinë e trombolizës.
Trajnimi i parë është mbajtur në Qendrën e Mjekësisë Urgjente në Prishtinë në kuadër të fushatës për ngritjen e gatishmërisë profesionale të shërbimeve urgjente mobile të Prishtinës për bartjen e pacientëve të cilët dyshohen se kanë pësuar infarkt iskemik akut trunor deri te Qendra Klinike Universitare e Kosovës (QKUK), në mënyrë që të realizohet ndërhyrja mjekësore e shpejtë për trajtimin e infarktit akut dhe minimizimit të pasojave të tij.
“Terapia trombolitike intravenoze dhe trombektomia mekanike janë dy mundësi të arta që aplikohen brenda dritares kohore të përshtatshme te pacientët që pësojnë infarkt iskemik akut. Kushti i parë i përfitimit nga terapia është që pacientët me këtë diagnozë të paraqiten, përkatësisht të sillen me kohë në Klinikën e Neurologjisë në QKUK. Ngase, aplikimi i terapisë trombolitike intravenoze është i mundshëm nëse realizohet brenda 4.5 orëve nga çasti i paraqitjes së simptomave, kurse aplikimi i trombektomisë mekanike, sipas rastit, mund të zbatohet brenda 24 orëve të para”, thuhet në njoftimin e Dr. Blerim Myftiut nga Shoqata e Neurologëve të Kosovës.
Tutje nga kjo shoqatë është bërë e ditur se njohja në vend të ngjarjes e simptomave të infarktit akut, transportimi sa më i shpejtë në qendrën spitalore dhe diagnostikimi rapid i mëtejmë shkurtojnë kohën deri te fillimi i terapisë dhe ky shkurtim në kohën e fillimit të terapisë është jetik për pacientët me infarkt në tru. Kur merret parasysh që 2 milionë qeliza nervore vdesin brenda një minute, slogani i fushatës “KOHAështëTRU” dhe urgjenca e ndërhyrjes e shpjegojnë vetvetiu peshën e mbërritjes së shpejtë të këtyre pacientëve në Klinikën e Neurologjisë.
Në kuadër të trajnimit të parë, personeli shëndetësor i urgjencave të kryeqytetit u informua nga Ass. Dr. Fisnik Jashari (koordinatori i projektit kombëtar për STROKE) për rëndësinë e krijimit të vijës së veçantë me të cilën pacientët do të tejkalojnë barrierën e vonesave infrastrukturore dhe kohore në Qendrën Emergjente dhe për detajet e mekanizmit me të cilin synohet që pacientët me infarkt iskemik akut të mbërrijnë deri te terapia brenda disa minutash.
Ndërkaq, Ass. Dr. Blerim Myftiu paraqiti rastet e përzgjedhura nga përvoja e deritanishme e terapisë trombolitike në Klinikën e Neurologjisë dhe dobinë që rastet e caktuara kanë fituar nga aplikimi i terapisë. Drejtori i Klinikës së Neurologjisë, Dr. Edmond Komoni, theksoi se Klinika e Neurologjisë është e gatshme për vëllimin e shtuar të punës dhe se zgjerimi i kapaciteteve të Klinikës për trajtimin e infarktit akut të trurit është elementi shtesë në kuadër të shumë projekteve që zbatohen dhe do të zbatohen në të ardhmen në këtë Klinikë.
Fillimi i trajnimit dhe intensifikimi i projektit u përshëndet nga drejtori i përgjithshëm i SHSKUK-së Elvir Azizi, drejtori i Drejtoratit për Shëndetësi në Komunën e Prishtinës Dr. Izet Sadiku, drejtori i Urgjencës së Prishtinës Avdyl Pacolli dhe zëvendësdrejtori i QKMF-së në Prishtinë Rrezart Halili. Punëtoritë trajnuese do të vazhdojnë në Qendrat e Mjekësisë Familjare në rajonin e Prishtinës për të vazhduar me komunat e tjera.