Të paktën 17 persona kanë vdekur nga një shpërthim kolere në qytezën Hammanskraal jashtë kryeqytetit të Afrikës së Jugut, thanë autoritetet të mërkurën.
Numri është rritur nga 10 vdekjet fillestare të raportuara nga autoritetet lokale shëndetësore në fillim të kësaj jave, shkruan Associated Press përcjell Gazeta Shneta.
Autoritetet thanë se kishte 29 raste të tjera të kolerës të konfirmuara nga laboratori, ndërsa 67 persona u pranuan në spital dhe klinika për infeksione gastrointestinale.
Mes tjerash, autoritetet shëndetësore nuk e kanë konfirmuar ende burimin e saktë të shpërthimit të kolerës, por menaxhimi i dobët i ujërave të zeza dhe paqëndrueshmëria e qeverisë lokale në kryeqytetin e Afrikës së Jugut janë fajësuar për situatën.
Një impiant uji në Pretoria, i cili është përgjegjës për menaxhimin e ujërave të zeza për pjesë të mëdha të Hammanskraal, ka nevojë për përmirësime urgjente që vlerësohet të kushtojnë rreth 130 milionë dollarë dhe nuk ka funksionuar siç duhet prej vitesh, tha kryebashkiaku i qytetit.
Në shkurt, Organizata Botërore e Shëndetësisë tha se rastet e kolerës në Afrikë po rriteshin në mënyrë eksponenciale mes një rritjeje globale. Të paktën 12 vende afrikane kanë raportuar shpërthime të kolerës këtë vit.
Autoritetet shëndetësore të Zimbabvesë kanë konfirmuar nëntë vdekje të fundit me 28 vdekje të tjera të dyshuara nga kolera që nga shkurti.
Rastet e kolerës në Afrikë i janë atribuar problemeve lokale sanitare, por edhe faktorëve klimatikë si ciklonet dhe përmbytjet që goditën pjesë të Afrikës Jugore kohët e fundit, si dhe mungesës globale të vaksinave kundër kolerës. /Gazeta Shneta/