Koalicioni i OJQ-ve për Mbrojtjen e Fëmijëve në Kosovë (KOMF) ka reaguar ndaj përfshirjes së fëmijëve në aktivitetet e fushatës zgjedhore, duke theksuar se fëmijët nuk duhet të përdoren për promovim politik nga subjektet politike.
Në një reagim publik, KOMF ka bërë të ditur se, pavarësisht thirrjeve të vazhdueshme për të mos i përfshirë fëmijët në aktivitete politike, subjektet politike po vazhdojnë t’i angazhojnë ata në kuadër të fushatës zgjedhore.
Sipas KOMF-it, përfshirja dhe shfrytëzimi i fëmijëve për qëllime politike përbën shkelje të të drejtave të tyre, cenon dinjitetin dhe mirëqenien e fëmijëve, si dhe bie ndesh me parimin e interesit më të mirë të fëmijës.
KOMF i ka bërë thirrje Komisionit Qendror të Zgjedhjeve (KQZ) që të monitorojë në mënyrë aktive aktivitetet e subjekteve politike dhe të ndërmarrë masa në përputhje me legjislacionin në fuqi në rastet kur konstatohet përfshirja ose shfrytëzimi i fëmijëve gjatë fushatës zgjedhore.
