Kosovarët përveç që marrin gjakun e dhuruesve nga bashkëkombësit e tyre, atë e blejnë edhe nga pjesëtarë të kombeve të tjera. Nga të dhënat e Doganës së Kosovës, kosovarët kanë paguar 484.48 euro për 60 gram gjak nga Franca.
Gjak ka ardhur edhe nga Anglia nga ku është paguar 8.95 euro për 18 gram. Gjak i shtrenjtë është paguar nga Japonia me 89.76 euro për 18 gram. Ndërsa më së shumti para kosovarët kanë paguar për gjakun e ardhur nga Norvegjia me 178.68 euro për vetëm 20 gram. Nga Belgjika 30 gram gjak është paguar me 260 euro.
Ndërsa vitin e kaluar në Kosovë llogaritet se kanë dhuruar gjak rreth 30 mijë vullnetarë. Drejtoresha e Qendrës Kombëtare të Transfuzionit të Gjakut, Bukurije Zhubi, ka thënë për Infokusin se që nga viti i kaluar janë afro 30 mijë dhurues të gjakut.
“Dhuruesit vullnetar të gjakut mbulojnë deri në 80 për qind të nevojave të pacientëve, pjesa tjetër ndihmohet përmes dhurimit të orientuar”, ka thënë Zhubi.
Sipas saj gjakun për nevojtarët e sigurojnë dhurues nga tërë territori i Kosovës. Në masë më të madhe ata i takojnë moshës së re.
Ndërkaq meshkujt janë ata të cilët mbulojnë pjesën më të madhe të furnizimit me gjak.
“Dhuruesit vullnetarë të gjakut janë nga i gjithë territori i Kosovës, Prishtina, Peja, Prizreni Gjakova, Gjilani, Mitrovica, Vushtrria, Ferizaj. 67 % e dhuruesve vullnetarë i takojnë grup moshës deri në 30 vjeç, kryesisht janë meshkuj deri 80 % respektivisht femrat 20%”, thotë Zhubi.
Ndryshe, java e dhurimit të gjakut nis në qershor. Dhurimi vullnetar i gjakut praktikohet çdo vit në Kosovë, dhe organizohet nga Qendra Kombëtare e Transfuzionit të Gjakut. /Infokusi.com