Qytetarët e Kosovës në vitet 2020 dhe 2021 kanë paguar nga xhepi i tyre mbi 249 milionë Euro për barna, mbi 34 milionë për trajtime ambulantore në sektorin privat, mbi 24 milionë për trajtim jashtë Kosovës dhe mbi 17 milionë euro për analiza në laboratorët privat
Një raport i Ministrisë së Shëndetësisë i përpiluar në nëntor të këtij viti, ka nxjerr shpenzimet e qytetarëve nga xhepi i tyre në institucionet private shëndetësore gjatë vitit 2020 dhe 2021, shkruan Gazeta Shneta.
“Raporti i llogarive kombëtare të shëndetësisë 2021” është një përmbledhje e të gjitha shpenzimeve për shëndetësi në sektorin publik dhe privat. Raporti është përpiluar nga një komision i përbërë nga anëtarë të MSH-së, Ministrisë së Financave, Thesarit, Agjencisë së Statistikave të Kosovës, i përkrahur edhe nga OBSH.
Sipas këtij raporti buxheti i shpenzuar në tre nivelet e shëndetësisë në Kosovë gjatë vitit 2021 ka qenë 293,336,694 Euro, mbi 21 milionë Euro më shumë sesa në vitin 2020 dhe rreth 72 milionë Euro më shumë sesa në vitin 2019.
Sipas raportit shpenzimet në shëndetësi në sektorin publik dhe privat, përfshirë sigurimet në kompanitë private si dhe donacionet në institucionet publike, kapin shumën prej mbi 512 milionë Euro në vitin 2022, shkruan Gazeta Shneta. Poashtu sipas raportit, 6.44 për qind në total është përqindja e Bruto Produktit Vendor për shpenzimet totale në shëndetësi.
Në raport janë publikuar të dhëna për shpenzimet e qytetarëve nga xhepi i tyre në sektorin privat. Në vitin 2020 dhe 2021, periudhë e cila ka shënuar situatën më të rëndë me pandeminë Covid-19, qytetarët e Kosovës kanë shpenzuar mbi 17 milionë Euro për analiza dhe radiografi në institucionet private.
Janë fiks 17,090,297 Euro të cilat qytetarët e Kosovës i kanë paguar nga xhepi i tyre për analiza dhe rentgen në laboratorët privat.
Qytetarët më së shumti kanë shpenzuar për blerjen e barnave. 249,815,819 është shuma që kanë paguar nga xhepi i tyre për blerjen e ilaçeve gjatë viteve 2020 dhe 2021.
Ndërkaq për shërbime ambulantore jashtë spitalore qytetarët e Kosovës sipas këtij raporti kanë paguar 34,311,735 Euro.
Gjatë këtyre dy viteve qytetarët kanë paguar poashtu për shërbime spitalore 11,141,888 Euro.
Sipas raportit, për shërbime shëndetësore jashtë vendit kosovarët kanë paguar 24,223,368 Euro.
Në total qytetarët e Kosovës për shërbime shëndetësore në institucione publike dhe private kanë shpenzuar 368,713,770 Euro në vitin 2020 dhe 2021. /Gazeta Shneta/
