Kryeinfermierja e njohur në Klinikën e Pulmologjisë Arta Sejdiu, ka kërkuar përkrahje nga kandidatët për deputetë për plotësimin e kërkesave të infermierëve.
“Ju deputetë të ardhshëm nga sistemi shëndetësor, qofshi mjekë a infermierë, edhe kjo çështje ju pret, pa dallim partie”, ka shkruar Sejdiu në një postim të saj në Facebook, ku ka bërë ‘tag’ kandidatët Dr. Ilir Kurtishi, Dr. Arben Bislimi, Dr. Arben Vitia, Dr. Ekrem Hyseni dhe Dr. Aurora Bakalli dhe infermierin Fitim Havolli, transmeton Gazeta Shneta.
Sejdiu është e njohur për aktivitetet e saj për realizimin e kërkesave të infermierëve. Ajo kishte kritikuar ish-kryeministrin Ramush Haradinaj për ngritjen e pagave për vete dhe zyrtarët e qeverisë, ndërsa kishte ironizuar se do t’ia jap edhe rrogën e saj nëse ka nevojë.
Ndërkaq në janar të këtij viti Sejdiu ka qenë në krye të protestave për plotësimin e kërkesave për përcaktimin e koeficientit në Ligjin e ri për Pagat të miratuar në Kuvendin e Kosovës. Për shkak se kërkesat e infermierëve nuk janë plotësuar në këtë ligj, Sejdiu tanimë po angazhohet që të marr përkrahje nga kandidatët për deputetë.
Më poshtë mund të gjeni videon ku Sejdiu pati dhënë një intervistë për RTK-në ku infermierët ajo i konsideron si krah i djathtë i mjekëve.
“Infermierët kryejnë një punë të madhe në QKUK dhe në tërë sistemin shëndetësor dhe një sistem shëndetësor pa infermier nuk mund të ekzistojë”, ka deklaruar Sejdiu. /Gazeta Shneta/