Bordi i SHSKUK-së ka kërkuar “vendim maksimal” në rastin e pretendimit për rrahje në Klinikën e Kardiologjisë.
Bordi i Shërbimit Spitalor Klinik dhe Universitar në mbledhjen e mbajtur javën e kaluar ka diskutuar për rastin e pretendimit për rrahje në Klinikën e Kardiologjisë dhe për peticionin e kardiologëve ku po kërkohet shkarkimi i drejtorit Lulzim Kamberi, shkruan Gazeta Shneta.
Kryesuesi i Bordit Naim Bardiqi ka kërkuar që të merret “vendim maksimal”, nëse vërtetohet se ka pasur dhunë fizike, ka mësuar Gazeta.
Para disa javësh kardiologu Fisnik Veliu ka pretenduar se është goditur fizikisht nga kolegu i tij Artan Ahmeti. Rasti kishte ndodhur në njërën nga sallat e kateterizimit pas një ngaterrese me radhën e pacientëve. Pretendimin e Veliut e kishte mohuar Ahmeti.
Rasti i tyre është trajtuar edhe në Komisionin Disiplinor. Gazeta Shneta ka mësuar se ka ndryshuar përbërja e anëtarëve të Komisionit për këtë rast.
Ndërkaq para disa ditësh 18 kardiologë u nënshkruan në një peticion ku përveç rastit të pretendimit për sulmin fizik, janë renditur edhe disa arsye të tjera për çka po kërkohet shkarkimi i drejtorit Lulzim Kamberi.
Për këtë peticion Bordi Drejtues ka kërkuar nga drejtori i përgjithshëm Elvir Azizi që të formoj një grup vlerësues nëse qëndrojnë apo jo këto pretendime.
Redaksia ka kërkuar sqarime nga SHSKUK dhe Bordi Drejtues për shqyrtimin e peticionit, por të njëjtit nuk kanë kthyer përgjigje. /Gazeta Shneta/