Policia e Kosovës ka arrestuar një specialist gjinekolog nga Spitali i Gjilanit sot.
Mjeku u arrestua pasi u raportua në polici nga një paciente e cila humbi foshnjën e saj gjatë lindjes, shkruan Gazeta Shneta.
Prokuroria njoftoi që mjeku Dr. Vaxhid Thaqi është dërguar në mbajtje 48 orë pas arrestimit.
“Gjilan, 22 Maj 2021– Prokuroria Themelore në Gjilan, Departamenti për Krime të Rënda ka kërkuar caktimin e masës së paraburgimit ndaj të pandehurit V.TH., për shkak të dyshimit të bazuar se ka kryer veprën penale ‘’Trajtimi i pandërgjegjshëm mjekësor’’, të Kodit Penal të Republikës së Kosovës.
Sipas kërkesës, ekziston dyshimi i bazuar se më 21 Maj 2021, i pandehuri V.TH., në Repartin e Gjinekologjisë në Spitalin Rajonal të Gjilanit, ka trajtuar në mënyrë të pandërgjegjshme mjekësore të dëmtuarën D.TH., në atë mënyrë që me rastin e lindjes së saj, duke përdorur metodat e pa përshtatshme të mjekimit, pas lindjes, për një kohë të shkurtë është konstatuar se fëmija është pa shenja jete.
Me urdhër të prokurorit të shtetit trupi i pa jetë i fëmiut është dërguar për obduksion në Institutin e Mjekësisë Ligjore, ndërsa i pandehuri V.TH., gjendet në ndalim 48 orësh”, thuhet në njoftimin e Prokurorisë në Gjilan. /Gazeta Shneta/