Dy kardiokirurgë kanë dhënë dorëheqje nga Klinika e Kardiokirurgjisë në Qendrën Klinike Universitare të Kosovës.
Kardiokirurgët Dr. Raif Çavolli dhe Dr. Arbër Kutllovci, kanë dhënë dorëheqje përfundimisht nga klinika më 27 dhjetor, shkruan Gazeta Shneta.
Gazeta ka mësuar nga burime brenda klinikës se Çavolli dhe Kutllovci kanë lënë punën për shkak të pengesave në ushtrimin e profesionit të tyre.
Kujtojmë se Shërbimi Klinik i Kardiokirurgjisë është themeluar me vendim të Qeverisë së Kosovës në vitin 2015. Specialisti i parë që ishte angazhuar atë kohë ka qenë Dr. Raif Çavolli.
Gazeta nuk ka mundur të marr edhe një deklaratë zyrtare nga menaxhmenti i SHSKUK-së.
Kutllovci në anën tjetër ka postuar gjatë ditës së djeshme një shkrim në profilin e tij në Facebook ku ka treguar se viti 2019 për të është përmbyllur me asnjë vdekje të rasteve elektive.
“Vitin 2019 në Kliniken e Kardiokirurgjisë e përmbylla me rastin e fundit elektiv kardiokirurgjik, me 0% mortalitet (vdekshmëri) në elektiv. Gjatë kësaj periudhe operova rastet me patologjitë më të vështira kardiokirurgjike: CABG, CABG+AVR, CABG+MVR, AVR (mekanike dhe biologjike), AVR+MVR, MVR+TP, AVR+LVOT reconstruction, Supracoronary graft interposition”, ka shkruar Kutllovci.
Kujtojmë se në Klinikën e Kardiokirurgjisë e cila udhëhiqet nga Dr. Tefik Bekteshi ka pasur edhe më herët pakënaqësi nga ana e stafit mjekësor. /Gazeta Shneta/