Ministri i Shëndetësisë, Dr Rifat Latifi, mori pjesë sot në një takim me drejtorët e Drejtorive Komunale të Shëndetësisë dhe Mirëqenies Sociale, të organizuar nga Kolegjiumi i drejtorëve të Shëndetësisë së komunave, ku temë diskutimi ishte situata në sektorin e shëndetësisë në komuna.
Kështu ka njoftuar ShSKUK përmes një njoftimi duke thënë se Latifi theksoi rëndësinë e Kujdesit Parësor Shëndetësor dhe bashkëpunimin dhe ndërlidhjen midis nivelit qendror dhe lokal.
“Ministri tha se në MSh po punohet shumë në shtatë shtyllat, të cilat sipas tij, kanë të bëjnë me transformimin e sektorit të shëndetësisë, me qëllim përmirësimin e cilësisë së shërbimeve shëndetësore dhe i cili sistem ka në qendër të vëmendjes ka pacientin”, thuhet në njoftim.
Duke përmendur rëndësinë e ligjeve të cilat janë në procedura të hartimit dhe shqyrtimit, ministri Latifi tha se në këtë aspekt është duke u punuar fuqishëm që të përmbushet agjenda legjislative dhe të bëhet edhe Ligji për transplantim të organeve.
Theks të veçantë, Ministri Latifi, vuri edhe tek funksionimi i Telemjekësisë në nivelin lokal, ku sipas tij, ky shërbim ka hyrë në funksion që nga viti 2002, ndërsa është e nevojshme të shtrihet në të gjitha qendrat rajonale shëndetësore të vendit.
Sa i përket procesit të vaksinimit, ministri Latifi tha se angazhimi i komunave në këtë aspekt, do të ketë efekt më të madh në përmirësimin e këtij procesi, sepse siç tha ai, ” COVID-19, është prezent dhe nuk ka kaluar”.
Ndërkaq, drejtorët e Drejtorive komunale të Shëndetësisë dhe Mirëqenies Sociale, u zotuan për bashkëpunim me nivelin qendror, duke përmendur gjithashtu edhe sfidat edhe problemet me të cilat ata po ballafaqohen, përfshirë edhe resurset humane të kufizuara./Gazeta Shneta