Kryetari i Odës së Farmacistëve të Kosovës ka ngritur idenë që të ketë vetëm nga një barnatore në hapësirat prej 3 mijë banorë, si dhe të ketë distancë në mes tyre e jo të jenë 2 e më shumë në një vend.
Kështu ka bërë të ditur kryetari i OFK-së, Arianit Jakupi, i cili këtë çështje e ka ngritur sot në një takim me përfaqësues nga institucione të ndryshme në diskutimet për koncept dokumentin për ndryshimin e Ligjit për Produkte dhe Pajisje Medicinale, shkruan Gazeta Shneta.
Postimi i plotë i Jakupit:
1 barnatore në 3 mijë banorë dhe distancë mes tyre sipas kritereve dhe standarteve evropiane.
Kjo është një ndër çështjet që si kryetar i Odës së Farmacistëve të Kosovës kam ngritur sot në takim me përfaqësues nga institucionet e ndryshme gjatë diskutimit të koncept dokumentit për ndryshimin e Ligjit për Produkte dhe Pajisje Medicinale. Ky si koncept është në fazat e para por besoj se së bashku do t’ia arrijmë këtij qëllimi.
Si Odë e Farmacistëve të Kosovës, do të marrim pjesë rregullisht në të gjitha takimet e radhës deri në aprovimin e ligjit, me qëllim të shtyrjes përpara të politikave të cilat kanë ndikim të drejtpërdrejtë në punën e farmacistit por edhe në proceset e cilësisë, sigurisë dhe efikasitetit të produkteve medicinale.