Në mbledhjen e Bordit të SHSKUK-së sot është prezantuar një raport i listave të pritjes në njësitë e SHSKUK-së, QKUK dhe spitale rajonale.
Lista më e gjatë e pritjes në QKUK është në radiologji me 2900 pacientë ku përfshihen shërbime si rezonanca magnetike, CT, USG, Echo Dopler dhe Biopsi, shkruan Gazeta Shneta.
Pas kësaj lista e pritjes më e gjatë është në Kardiologji Invazive me rreth 2600 pacientë që presin për shërbimin e koronarografisë dhe stentimit.
Ortopedia është e treta me rreth 2500 pacientë në listë të pritjes për proteza të gjurit dhe kërdhokulla. Pacientët presin nga viti 2020.
Kirurgjia vaskulare është klinika e radhës me më së shumti pritje. Rreth 1600 pacientë presin për shërbimin e heqjes së venave varikoze.
Klinikat tjera me më së shumti pacientë në lista të pritjes janë Oftalmologjia për kataraktë, ORL për shërbime pediatrike, rinologji dhe laringologji, Kirurgjia e Fëmijëve, Kirurgjia Torakale, Urologjia, Kirurgjia plastike etj.
Ndërkaq në spitalet rajonale më së shumti pacientë presin në Spitalin e Prizrenit me rreth 700 pacientë në listë për MRI, CT, USG dhe kardiologji invazive. Në Pejës për shërbimin e MRI-së, Echo, Mamografi, Kirurgji dhe Urologji presin rreth 410 pacientë.
Lista të pritjes ka edhe në spitalet tjera.
Në Qendrën Klinike Stomatologjike dhe Universitare pacientët presin për dy shërbime, në Ortodonci me rreth 320 pacientë si dhe në Protetikë me rreth 376 pacientë. /Gazeta Shneta/