Ministria e Arsimit dhe e Shkencës (MASh) ka shpallur thirrje publike për rekrutimin e një koordinatori dhe tre specialistëve në kuadër të Projektit për Arsimin dhe Kujdesin në Fëmijërinë e Hershme, i cili mbështetet nga Banka Botërore.
Sipas njoftimit, bëhet fjalë për gjithsej katër pozita profesionale: koordinator/e i/e projektit, specialist/e i/e prokurimit, specialist/e i/e monitorimit dhe vlerësimit, si dhe specialist/e i/e menaxhimit financiar.
“Këto pozita janë pjesë e Njësisë për Zbatimin e Projektit (NJZP) dhe kanë për qëllim mbështetjen e realizimit efektiv të aktiviteteve të projektit”, thuhet në njoftimin e MASh-it.
Tutje theksohet se përmes këtij projekti synohet të kontribuohet në përmirësimin e cilësisë dhe rritjen e qasjes në shërbimet e edukimit në fëmijërinë e hershme në Kosovë.
“Përmes këtij rekrutimi synohet forcimi i kapaciteteve institucionale për zbatimin e projektit, si dhe avancimi i prioriteteve strategjike në zhvillimin e kapitalit njerëzor”, njofton ministria.
MASh ka ftuar të gjithë kandidatët e interesuar që të aplikojnë sipas kritereve dhe afateve të përcaktuara në shpalljen zyrtare, e cila është publikuar në ueb-faqen e ministrisë.