Jo më shumë se 10 gra ia mësyjnë maternitetit të komunës së Lipjanit për të kryer lindjen e fëmijës së tyre. Ky numër kaq i vogël ndodhë për shkak të kushteve të mjerueshme në sallën e lindjes
Besarta Gashi
Në sallën e lindjes në Maternitetin e komunës së Lipjanit nuk është investuar prej më shumë se 20 viteve. Kushtet e mjerueshme bëjnë që të kryhen më pak se 10 lindje brenda një viti. Kjo është arsyeja pse nënat e kësaj komune drejtohen në Klinikën e Gjinekologjisë në QKUK.
Shemsie Jezerci, koordinatore dhe motër kryesore në këtë maternitet, thotë se objekti është shumë i vjetruar dhe ka mungesë të mjeteve elementare për kryerjen e një lindje.
“Kemi mungesë të gërshërëve e deri tek materiali i fundit. Salla e lindjes është jo aq funksionale pasi tavolina daton prej 20 viteve dhe nuk është bërë asnjë investim në sallë”, deklaron Jezerci.
Në mungesë të kushteve për shërbime sekondare, ky institucion kryen vetëm shërbime primare. Gratë shtatzëna mund të kryejnë kontrolla si dhe të marrin këshilla për gjidhënien dhe të tjera.
Në Maternitet punojnë vetëm dy gjinekologë, ndërsa gjatë natës pacientet pranohen vetëm nga mamitë.
Qendra posedon 3 dhoma me gjithsej 10 shtretër, numër ky mjaft i vogël për të pranuar numrin e nënave që lindin përgjatë vitit në këtë komunë.
Materniteti shfrytëzohet edhe për shërbime tjera primare si marrjen e infuzioneve dhe të tjera duke ndihmuar Qendrën e Mjekësisë Familjare.
Jezerci ka bërë të ditur se në bashkëpunim me UNICEF-in kanë filluar vizitat shtëpiake.
“Nëpërmjet këtyre vizitave ne i mbështesim nënat pas lindjes qysh në ditën e tretë deri kur fëmija mbush 3 vjeç. Para 9 muajsh kur kemi filluar projektin dhe deri më tani kemi kryer rreth 250 vizita”, ka deklaruar ajo.
Drejtori i QKMF-së në komunën e Lipjanit, Agim Krasniqi, thotë se është e pamundur që materniteti të kryej shërbimet sekondare.
Ai thotë se gjinekologët thirren gjatë ndërrimit të natës, por vetëm në rastet e lindjeve me rrezik të ulët. Krasniqi ka deklaruar se investimi në maternitet duhet të kryhet nga Ministria e Shëndetësisë, ndërsa ka shtuar se pritet të merret një donacion për të shtuar numrin e stafit. /Gazeta Shneta/