Autoritetet evropiane të sigurisë ushqimore kanë identifikuar noodles instant me shije si burimin më të mundshëm të një shpërthimi shumëkombësh të infeksioneve me Salmonella, i cili deri tani ka prekur 106 persona në 14 vende evropiane. Shumica e të prekurve janë fëmijë dhe të rinj, ndërsa 49 pacientë kanë pasur nevojë për shtrim në spital.
Sipas European Food Safety Authority dhe European Centre for Disease Prevention and Control, hetimet epidemiologjike dhe analizat laboratorike kanë lidhur rastet me noodles instant me shije pule dhe pule pikante, të prodhuara në një fabrikë në Ukrainë. Rastet janë raportuar në Austri, Britani të Madhe, Çeki, Danimarkë, Estoni, Francë, Gjermani, Hungari, Letoni, Lituani, Holandë, Norvegji, Poloni dhe Suedi, shkruan AP News, transmeton Gazeta Shneta.
Kompania Reeva Foods ka bërë të ditur se ka tërhequr nga tregu seritë e dyshuara të produkteve dhe ka nisur një hetim të brendshëm, duke bashkëpunuar me autoritetet.
Ndërkohë, ekspertët paralajmërojnë se rreziku nuk është eliminuar plotësisht, pasi këto produkte kanë afat të gjatë përdorimi dhe mund të gjenden ende në treg ose në shtëpitë e konsumatorëve.
Simptomat e salmonelozës përfshijnë diarre, ethe, dhimbje barku, të përziera dhe të vjella. Në shumicën e rasteve sëmundja kalon brenda pak ditësh, por mund të jetë e rëndë për fëmijët e vegjël, të moshuarit dhe personat me sistem imunitar të dobësuar.
Autoritetet u bëjnë thirrje qytetarëve të mos konsumojnë produktet e tërhequra nga tregu dhe të respektojnë udhëzimet për përgatitjen e sigurt të ushqimit. /Gazeta Shneta/