Zyrtarët shëndetësorë nuk kanë identifikuar ende burimin e një virusi të ri të gripit të derrit H1N2 që infektoi një person në Mbretërinë e Bashkuar.
Të hënën, Agjencia e Sigurisë Shëndetësore në Mbretërinë e Bashkuar (UKHSA) konfirmoi se një person u infektua me gripin A(H1N2)v, një lloj gripi i derrit i ngjashëm me viruset që qarkullojnë në derrat në Mbretërinë e Bashkuar, por i ndryshëm nga rastet e tjera të fundit të gripit të derrit njerëzor në mbarë botën, shkruan Health News përcjell Gazeta Shneta.
Agjencia thotë se individi iu nënshtrua një testi rutinë të shqyrtimit të gripit në një strukturë të kujdesit shëndetësor në North Yorkshire pasi kishte përjetuar simptoma të frymëmarrjes.
Testimi i reaksionit zinxhir polimerazë (PCR) dhe sekuenca e gjenomit identifikuan shtamin si A(H1N2)v.
Sipas UKHSA, personi përjetoi një sëmundje të lehtë dhe u shërua plotësisht.
Zyrtarët shëndetësorë në Mbretërinë e Bashkuar po hetojnë rastin për të përcaktuar karakteristikat e këtij lloji të gripit të derrit dhe për të vlerësuar nëse ai paraqet rrezik për shëndetin e njeriut.
Agjencia thekson se individi i infektuar nuk ka pasur ekspozim ndaj derrave përpara se të sëmurej.
UKHSA thotë se 50 raste të influencës njerëzore A(H1N2)v janë raportuar globalisht që nga viti 2005. Megjithatë, asnjë prej tyre nuk është i lidhur gjenetikisht me këtë lloj. Për më tepër, zyrtarët shëndetësorë nuk kanë zbuluar më parë raste njerëzore të A(H1N2)v në Mbretërinë e Bashkuar. /Gazeta Shneta/