Spitali i Përgjithshëm i Mitrovicës ka bërë të ditur se Shërbimi Ambulantor i Psikiatrisë, i cili funksionon në kuadër të këtij institucioni, ka realizuar 1,771 vizita psikiatrike gjatë vitit 2025, pavarësisht se shërbimi operon me vetëm një psikiatër.
Sipas njoftimit të spitalit, të gjitha këto shërbime janë ofruar nga Dr. Gëzim Shabani, specialist i Psikiatrisë, transmeton Gazeta Shneta.
Në totalin e vizitave përfshihen trajtimet e rregullta ambulatore, ndërhyrjet emergjente në situata krize, trajtimet e detyruara në përputhje me legjislacionin në fuqi, si dhe konsultat psikiatrike për pacientët e shtruar në repartet e tjera të spitalit.
Spitali i Mitrovicës thekson se Shërbimi Ambulantor i Psikiatrisë mbetet funksional për qytetarët që kanë nevojë për kujdes të specializuar të shëndetit mendor, ndërsa të dhënat e publikuara pasqyrojnë volumin e punës së realizuar gjatë vitit 2025./Gazeta Shneta/