Menaxhmenti i SHSKUK-së ka vizituar sot Spitalin e Përgjithshëm të Gjilanit ku kanë premtuar përkrahje me investime në projekte të ndryshme.
Kryesuesja e Bordit Dr. Agreta Gecaj-Gashi dhe drejtori i përgjithshëm dr. Valbon Krasniqi, kanë folur për furnizimin e këtij spitali me rezervuarin e oksigjenit si dhe planet për shtrirjen e rrjetit në të gjithë spitalin.
Ata kanë falënderuar stafin e këtij spitali për punën dhe angazhimin e tyre gjatë pandemisë.
Lexoni më poshtë njoftimin e plotë:
Kryesuesja e Bordit të Shërbimit Spitalor Klinik Universitar të Kosovës, Agreta Gecaj- Gashi, anëtarët e Bordit të SHSKUK-së dhe drejtori i Përgjithshëm i SHSKUK-së, Valbon Krasniqi, vizituan Spitalin e Përgjithshëm të Gjilanit, gjersa u pritën nga ushtruesi i detyrës së drejtorit, Arsim Emini, me të cilin diskutuan për sfidat dhe kërkesat e stafit shëndetësor, në funksion të krijimit të kushteve më të mira për punë dhe rritjes së cilësisë në ofrimin e shërbimeve më të mira shëndetësore.
Fillimisht, drejtori Valbon Krasniqi falënderoi stafin shëndetësor dhe teknik për punën gjatë gjithë kohës së pandemisë.
Drejtori i SHSKUK-së foli edhe për me furnizimin me oksigjen, si dhe shtrirjen e rrjetit të munguar të oksigjenit edhe nëpër repartet tjera të spitaleve të përgjithshme, një projekt që pritet të fillojë së implementuari shumë shpejt, edhe pse me vendosjen e rezervuarve të oksigjenit, është krijuar stabiliteti i nevojshëm për furnizim të qëndrueshëm.
Ai, më tutje, theksoi edhe nevojën e krijimit të një rrjeti të depove të barnave në nivel të SHSKUK-së në të ardhmen e afërt, derisa vlerësoi se modernizimi i infrastrukturës është prioritet i SHSKUK-së, kurse nevojë imediate për spitalet e përgjithshme.
Ndërkaq, kryesuesja e bordit të SHSKUK-së, Agreta Gashi- Gecaj, e cila bashkë me drejtorin Krasniqi dhe anëtarët tjerë të bordit vizituan repartet e spitalit, falënderoi secilin punëtor shëndetësor për punën e palodhshme, angazhimin deri në vetëmohim, sidomos gjatë periudhës së Pandemisë COVID-19.
Gecaj- Gashi u zotua se do të angazhohen pa kursim për implementimin e projekteve infrastrukturore të hartuara për Spitalin e Gjilanit, në mënyrë që gjendja aktuale të ndryshojë, stafi shëndetësor të ketë kushte më të dinjitetshme për punë, ndërsa pacienti të marrë trajtim mjekësor më cilësor.
Në anën tjetër, drejtori i Spitalit të Gjilanit, Arsim Emini, falënderoi menaxhmentin e SHSKUK-së për përkrahjen, në veçanti për vendimin rreth rezervuarit të oksigjenit, i cili i ka dhënë fund problemeve me furnizim atje.
Drejtori Krasniqi dhe anëtarët e Bordit të SHSKUK-së do të vazhdojnë turin e vizitave në spitalet tjera javën e ardhshme.