Mikrobiologjia luan një rol kyç në mbrojtjen e shëndetit publik përmes diagnostikimit të saktë dhe në kohë të sëmundjeve infektive, thekson Dr. Donjeta Pllana-Hajdari, ushtruese e detyrës së udhëheqëses së Departamentit të Mikrobiologjisë në IKSHPK.
Ajo thekson se parandalimi, izolimi dhe kontrolli i patogjenëve përmes analizave laboratorike janë thelbësore për ndërprerjen e përhapjes së infeksioneve, shkruan Gazeta Shneta.
Sipas saj, vetëm përmes laboratorit mund të bëhet dallimi i saktë mes sëmundjeve që kanë simptoma të ngjashme.
“Vetëm simptomat nuk mjaftojnë për të përcaktuar diagnozën dhe për të dhënë terapinë”, thekson ajo.
Dr. Pllana-Hajdari shton se një pjesë e madhe e analizave laboratorike në këtë departament lidhen me infeksionet e rrugëve respiratore, ato urogjenitale, si dhe me skriningje për shtatzëni dhe testime serologjike për hepatit.
“Më së shumti bëhen analiza nga komuniteti për infeksionet e rrugëve respiratore të sipërme dhe të rrugëve urogjenitale. Pastaj bëhen edhe teste si skrining për planifikim të shtatzënisë ose teste serologjike për hepatit. Numri më i madh i analizave i takon këtyre,” u shpreh Dr. Pllana-Hajdari. /Gazeta Shneta/
Për këto dhe të tjera, ndiqni videon më poshtë: