Ministri i Shëndetësisë Rifat Latifi është pyetur sot nga deputeti i Lëvizjes Vetëvendosje Fitim Uka, nëse shërbimet shëndetësore do të rrezikohen nga ikja e anesteziologëve nga sektori publik në privat.
Latifi ka deklaruar kjo situatë është pasojë e mungesës së konkursit për specializime nga viti 2016 deri në fund të vitit 2020, gjë që sipas tij Kosova ka humbur dy gjenerata të mundshme të anesteziologëve, shkruan Gazeta Shneta.
“Cështja e anesteziologëve është lënë pas dore për vite të tëra, që nga viti 2016 nuk kemi pas konkurs për specializime. Po të ishte bërë kjo tani do të kishim dy gjenerata të anesteziologëve. Pasojat po i përjetojmë tash. Nga viti 2020 mungojnë 22 anesteziologë”.
“Ne në QKUK janë 34 salla të operacionit të shkapërderdhura gjithandej në QKUK, të personalizuara për shërbime të caktuara dhe jo salla që mund të përdoren për të gjitha disiplinat. Nuk është krijuar vetëm një bllok me salla. Ne nuk kemi një menaxhim të strukturuar për salla të operacionit. Këta anesteziologë mbulojnë 40 njësi klinike”, ka thënë Latifi.
Ai ka shtuar se anesteziologët do të trajtohen me prioritet dhe si profil deficitar.
“Është e qartë se duhet t’i trajtojmë anesteziologët si prioritet dhe profesionist deficitar sikurse ata të IT-së dhe duhet të jemi kreativ në solucione për t’i kthyer edhe ata që nuk punojnë në sektorin publik”, ka deklaruar Latifi. /Gazeta Shneta/