Ministri në largim i Shëndetësisë, Imet Rrahmani, po e lë këtë pozitë me shumë parregullsi në menaxhimin e buxhetit dhe shkelje ligjore.
Sipas Ligjit të Buxhetit, Rrahmani kishte të drejtë të punësonte 10 zyrtarë në kabinetin e tij, por si duket kjo nuk i mjaftonte, shkruan Gazeta Shneta.
Ai kishte dyfishuar numrin e stafit, duke shkelur kështu Ligjin pas rishikimit të tij.
“Sipas ligjit të rishikuar të buxhetit numri i paraparë i të punësuarve në kabinetin e Ministrit ishte dhjetë (10). MSh ka tejkaluar dukshëm, përkatësisht ka dyfishuar numrin e stafit të punësuar në kabinet, në 20 vetë”, thuhet në raportin e Zyrës Kombëtare të Audimit për vitin 2016.
ZKA-ja në këtë raport konsideron se tejkalimi i numrit të stafit paraqet planifikim joefikas të nevojave dhe ndikon në shpenzimin joracional të buxhetit.
Ministria e Shëndetësisë poashtu ka vazhduar të angazhojë staf me kontrata për shërbime të veçanta, të cilët punësohen pa konkurs dhe paguhen në mënyrë jo të rregullt.
“MSh vazhdon të angazhojë staf me kontrata për shërbime të veçanta, të cilët angazhohen pa procedura të rregullta të rekrutimit. Duke ju referuar të dhënave në PFV për vitin 2016, MSh ka raportuar gjithsej 28 raste me kontrata të tilla prej të cilëve 12 i takojnë AKPPM-së. Ata paguhen nga mallrat dhe bshërbimet dhe kohëzgjatja e tyre kishte tejkaluar afatet e lejuara me ligj”, thuhet tutje në raport.
ZKA ka gjetur se në MSH janë të punësuar pesë zyrtarë si Ushtrues Detyre më gjatë se tre muaj, gjë që është në kundërshtim me Ligjin për Shërbimin Civil. /Gazeta Shneta/