Ministri i Shëndetësisë, Arben Vitia, ka thënë se investimet e vazhdueshme në sektorin publik shëndetësor kanë sjellë rezultate konkrete në përmirësimin e shërbimeve dhe zvogëlimin e nevojës për trajtim jashtë institucioneve publike.
Sipas tij, në vitin 2024 janë regjistruar 241 referime më pak për trajtim jashtë spitaleve publike në krahasim me vitin 2019. Për më tepër, vetëm në tremujorin e parë të vitit 2025, ka pasur 101 referime më pak sesa në të njëjtën periudhë të vitit të kaluar, transmeton Gazeta Shneta.
Ministri shtoi se këto zhvillime po ndikojnë në rritjen e besimit të qytetarëve ndaj institucioneve publike shëndetësore, një objektiv ky i rëndësishëm për Ministrinë e Shëndetësisë.
Postimi i plotë:
Me investimet në pajisje të avancuara, shtimin e shërbimeve të reja, infrastrukturë, resurset njerëzore dhe trajnimet e vazhdueshme, numri i pacientëve që referohen për trajtim jashtë institucioneve publike ka pësuar rënie të ndjeshme.
Në vitin 2024 ka 241 referime jashtë spitaleve publike më pak se në 2019.
E, vetëm në tremujorin e parë të 2025, janë 101 referime më pak se në të njëjtën periudhë të vitit të kaluar.
Këto të dhëna dëshmojnë se sistemi ynë shëndetësor publik po bëhet gjithnjë e më i pajisur për të ofruar shërbime brenda vendit. Kësilloj rritja e besimit të qytetarëve në institucionet publike është e pashmangshme.
#MinistriaShëndetësisë #ShëndetiPublik