Organizata “Demokraci Plus” ka organizuar gjatë ditës së sotme një tryezë ku është diskutuar për Draftin e Udhëzimit Administrativ për Përcaktimin e Çmimeve të Barnave dhe Pajisjeve Medicinale.
Ministri i Shëndetësisë, Uran Ismaili, ka deklaruar se institucionet publike për një kohë të gjatë kanë blerë barna me çmime më të larta sesa ato të tregut. Ai tha se ka tendencë që një gjë e tillë të vazhdojë edhe më tutje duke krijuar mundësi për abuzim nga zyrtarët apo operatorët ekonomik.
“Ky edhe ka qenë qëllimi që e kemi nisur këtë proceset që të parandalojmë abuzimin e parasë publike, duke ditur në anën tjetër që buxheti i ministrisë është i limituar. Në diskutimet tona të brendshme kemi kërkuar asistencë nga OBSh, me të cilën kemi filluar një diagonistimi të situatës pastaj të shkojmë te zgjidhjet”.
Isuf Zejna, menaxheri i Programit në D+, tha se në këtë proces janë të rëndësishme baza ligjore, margjinat e fitimit të barnave që do të rimbursohen.
“Ajo qe na ka shty të organizojmë këtë takim, ka qenë fakti që kemi për here të pare një bazë të tillë ligjore. Disa prej çështjeve që janë të rëndësishme, është se sa kemi bazë ligjore për një udhëzim të tillë. Çështje të tjera janë edhe margjinat e fitimit te barnave që do të rimbursohen. Në Shqipëri kemi vërejte se margjinat variojnë 8 deri 24 për qind. Është me rëndësi që këto çmime të përcaktohen në mënyrë transparente, dhe komisioni është mire të ketë përfaqësues te organizatave, të cilët do të ishin si vëzhgues. E rëndësisë është edhe çështja e ankesave”.
Saranda Ramaj nga Instituti Columbus, dhe gazetare në gazetën Koha Ditore, tha se kanë realizuar një hulumtim të kontratave të ministrisë së shëndetësisë dhe sipas saj 200 produkte janë blerë me çmime abuzive.
“Ne kemi përfunduar një hulumtim për kontratat e ministrisë së Shëndetësisë dhe ka dalë që rreth 200 produkte janë blerë me çmime abuzive. Rritja e çmimeve ka ndodhur nga 100 deri në 2 mijë për qind”, ka deklaruar Ramaj.
Në diskutim kanë marrë pjesë edhe anëtarë të komisionit parlamentar për shëndetësi. /ekonomiaonline