Në Klinikën e Pediatrisë në Qendrën Klinike Universitare janë shfaqur minjtë. Një i tillë ka ngordhur në kurth, por zyrtarët e QKUK-së thonë se s’ka rrezik për pacientët
Përveç papastërtisë dhe mirëmbajtjes jo të duhur të klinikave në QKUK, tani janë shfaqur edhe minjtë. Një i tillë është fotografuar në repartin e Gastros në Klinikën e Pediatrisë, shkruan Gazeta Shneta.
Një familjar i një fëmije ka dërguar disa fotografi në adresë të Gazetës, ku shihet një mi i ngordhur në kurthin me ngjitës të vendosur nga stafi. Gazeta ka kërkuar sqarime nga menaxhmenti i QKUK-së, nëse kompania përgjegjëse për pastrimin e klinikave do të duhej t’i evitonte gjitarët e vegjël në mënyrë që të mos rrezikojnë shëndetin e pacientëve.
Por QKUK e ka trajtuar këtë problem vetëm në nivelin e pasojave, duke mos u marr me evitimin e tij. Zyrtarët thonë se janë kryer procedurat e DDD-së dhe gjithçka është në rregull.
“Ju njoftojmë se QKUK ka kontratë të rregullt për kryerjen e DDD në hapësirat e saj. DDD kryhet në të gjitha klinikat. Pas shqetësimit të ngritur nga ana e Klinikës së Pediatrisë, menjëherë është bërë DDD dhe gjithçka është në rregull dhe këtë mund të ju konfirmoi edhe klinika”, thuhet në përgjigjen e QKUK-së. /Gazeta Shneta/