Si pasojë e stresit, ushqimeve të përpunuara dhe me hormone, stilit të jetesës dhe shumë faktorëve të tjerë, del të jetë që sëmundjet e veshkave po rriten në shifra alarmante, nga të cilat tanimë vuajnë edhe 30-vjeçarët, ndërkohë që më parë problemet me veshkat fillonin mbi moshën 40 vjeç.
“Rezultatet e fundit të këtij 4-vjeçari, janë të frikshme. Sot kjo shifër thuhet që ka shkuar në 14-15 %, çka do të thotë se është një situatë alarmi të jashtëzakonshëm për shëndetin, për cilësinë e jetesës, por pse jo edhe për buxhetin e shtetit dhe taksat tona. Kjo sepse një person që shkon për dializë, i kushton shtetit jashtëzakonisht shumë”, shprehet Shefi i Shërbimit të Nefrologjisë, Myftar Barbullushi për Top Channel.
Sipas mjekëve, çdo person që ka problem me zemrën apo me diabetin duhet të kontrollojë dhe veshkat pasiqë këto janë shumë të lidhura bashkë.
“Të gjithë mekanizmat e hipertensionit konvergojnë në një organ, që është veshka dhe që sjell lindjen e tensionit të lartë. Krahas sëmundjeve tumorale, diabetit apo sëmundjeve të zemrës, prioritet pritet t’i jepet edhe sëmundjeve të veshkave, në konferencën e Kombeve të Bashkuara”, u shpreh Barbullushi. / Gazeta Shneta