Legjislatura e dytë e Kuvendit të Odës së Mjekëve të Kosovës ka mbajtur sot mbledhjen e katërt ku kryetari Dr. Pleurat Sejdiu ka raportuar për punën 6 mujore, si dhe për planet e 6-mujorit të dytë. OMK vetëm në tre mujorin e parë ka arritur të krijoj të hyra mbi 50 mijë euro, ndërsa ka deklaruar obligime për janar-mars mbi 24 mijë euro.
Sejdiu ka raportuar para anëtarëve të Kuvendit mbi aktivitetet e tij dhe përmbushjen e programit nga dhjetori i vitit të kaluar. Ai ka folur mbi bartjen e kompetencave nga Ministria e Shëndetësisë, anëtarësimin e mjekëve, bashkëpunimin me Odat rajonale dhe ndërkombëtare, donatorët dhe institucionet e shtetit, shkruan Gazeta Shneta.
Një nga sfidat që po përballet Oda e Mjekëve është anëtarësimi i mjekëve që punojnë në spitale private. Rreth 15 për qind e mbi 200 mjekëve që punojnë në institucione private, kanë paguar më pak se 20 euro anëtarësinë vjetore në OMK. Kjo ka ardhur si pasojë e mosdeklarimit real të rrogës nga këta mjekë. Madje sipas Sejdiut ka pasur të tillë që kanë paguar vetëm 10 euro.
Sejdiu e ka konsideruar të papranueshme deklarimin e rrogës 100 euro nga mjekët që punojnë në spitale private. “Askush të mos më tregojë se paguhe 100 euro në privat. Krejt kjo po ndodhë sepse është vendosur 0.8 për qind në pagë, kurse me ligj pagë është çdo e ardhur që tatimohet. Këto çështje do t’i diskutojmë në vijim”, ka thënë Sejdiu.
Ai ka theksuar se minimumi i anëtarësisë nga sektori publik është 54 euro tek mjekët e përgjithshëm pa specializim të cilët marrin pagë 565 euro.
Kryemjeku i Kosovës ka theksuar poashtu hezitimin e mjekëve të huaj për t’u anëtarësuar në Odë. Ai ka thënë se kjo po ndodhë për shkak të hutisë që kanë krijuar disa individë të Ministrisë së Shëndetësisë dhe pronarët e spitaleve private ku punojnë këta mjekë.
“Mjekët e huaj po hezitojnë të anëtarësohen si pasojë e hutisë të krijuar nga individë të caktuar nga MSH për çka kemi biseduar edhe me ministrin, si dhe nga pronarët e spitaleve. Ne e kemi sqaruar se këta mjekë nuk do të mund të licencohen pa u anëtarësuar në Odën e Mjekëve. Kjo është vendosur decidivisht edhe nga Zyra Ligjore dhe kjo do t’iu përcillet edhe spitaleve private, në të kundërtën do të vendosen sanksionet nga Gjyqi i Nderit”, ka deklaruar Sejdiu.
Pas raportit të punës, disa prej anëtarëve të Kuvendit kanë shtruar pyetje si dhe kanë dhënë rekomandimet e tyre për organet e Odës. Ndërsa më vonë është diskutuar për plotësim-ndryshimin e Statutit si dhe votimin e draft rregulloreve. /Gazeta Shneta/