Shtesa për mjekët që punojnë vetëm në sektorin publik pritet të ekzekutohet me pagën e dhjetorit.
Mjekët të cilët punojnë vetëm në institucionet e sektorit publik në Kosovë, do të marrin shtesat e premtuara nga ministri i Shëndetësisë Arben Vitia në shkurt të këtij viti, shkruan Gazeta Shneta.
Gazeta ka mësuar se MSh është dakorduar me Ministrinë e Financave që këto shtesa të ekzekutohen me pagën e muajit dhjetor. Shtesat do të jepen retroaktiv për 6 muajt e fundit.
Shtesat do të jenë deri në 25 për qind të pagës bazë apo deri në 150 euro, porse do të varet nga numri i mjekëve që do t’i plotësojnë kriteret.
Këto shtesa do të jepen përmes Rregullores për shtesën e nëpunësit të sistemit shëndetësor, për mjekë specialistë në cilindo nivel të shëndetësisë.
Megjithatë në njërin nga paragrafët e Rregullores thuhet se shuma totale e shtesës nuk mund të jetë më e lartë se 1 për qind e fondeve totale të përdorura nga organizata buxhetore për pagën bazë të zyrtarëve publikë të organizatës buxhetore në të njëjtin vit.
Përveç kritereve të lartpërmendura, neni 5 i kësaj Rregulloreje thotë se për të qenë përfitues i kësaj shtese, mjeku specialist duhet të ketë vlerësim pozitiv të performancës në bazë të indikatorëve të vlerësimit të njësisë përkatëse e dhënë nga mbikëqyrësi i drejtpërdrejtë, të nënshkruajë deklaratën nën betim, të ketë dëshmi që ndaj tij nuk është duke u zhvilluar hetim apo procedurë gjyqësore, e as nuk është i dënuar për vepër penale lidhur me ushtrimin e detyrës dhe vepra të korrupsionit.
“Pavarësisht përcaktimeve të këtij neni, nuk mund të përfitojnë këtë shtesë nëpunësit e sistemit shëndetësor që kanë kontratë pune në një institucion tjetër privat dhe nuk janë pronar/bashkëpronar apo aksionar i një biznesi privat”, thuhet në Nenin 5, pika 2 e rregullores. /Gazeta Shneta/
