Familja e ish-presidentit Hashim Thaçi ka shprehur mirënjohje të thellë për mjekët, infermierët dhe personelin shëndetësor të Qendrës Klinike Universitare të Kosovës (QKUK), të cilët u kujdesën për babanë e tij gjatë muajve të fundit.
Në një mesazh falënderimi, familja Thaçi vlerëson përkushtimin dhe profesionalizmin e mjekëve, të cilët luftuan me të gjitha mundësitë për ta mbajtur në jetë të ndjerin. Disa prej tyre ishin sot të pranishëm në të pamen e hapur për të shprehur ngushëllimet e tyre.
“Gjatë gjithë këtyre muajve, ata nuk ishin vetëm mjekë, infermierë e personel shëndetësor. Ata u bënë edhe pjesë e dhimbjes së familjes! Faleminderit për gjithçka!”, thuhet në mesazhin e familjes Thaçi.
Familja shpreh mirënjohje të përhershme për kujdesin dhe mbështetjen e treguar nga stafi shëndetësor, duke theksuar humanizmin dhe përkushtimin e tyre në momentet më të vështira.
Postimi i plotë:
Një falënderim të madh për mjekët, infermierët dhe personelin shëndetësor që u kujdesën për babanë e presidentit Thaçi në QKUK.
Disa nga ta ishin edhe sot për ngushëllime në të pamen e hapur.
Ata luftuan me përkushtim, profesionalizëm dhe zemër të madhe, duke mos u dorëzuar përballë sfidës më të vështirë: luftës për jetën.
Familja e presidentit Thaçi është përjetësisht mirënjohëse për kujdesin e tyre të palodhur, mbështetjen e vazhdueshme dhe humanizmin që treguan në çdo moment.
Gjatë gjithë këtyre muajve, ata nuk ishin vetëm mjekë, infermierë e personel shëndetësor. Ata u bënë edhe pjesë e dhimbjes së familjes!
Faleminderit për gjithçka!