Pagat e mjekëve dhe të infermierëve janë rritur me miratimin e Ligjeve në Kuvendin e Kosovës, kjo gjë nuk po i ndal mjekët të ikin nga Kosova.
Pikërisht paga konsiderohet si arsyeja kryesore që infermierët dhe mjekët po ikin, ku destinacion të tyre më të shpeshtë kanë Gjermaninë.
Në 3 mujorin e parë të këtij viti, rreth 37 mjekë specialistë kanë ikur nga vendi ynë, derisa gjatë vitit 2018 janë larguar gjithsej 154 mjekë specialist.
“Në Odën e Mjekëve janë gjithsej 154 kërkesa që nga marrja e kompetencave, duke marrë parasysh se nuk kemi informatë se për cilin vend janë kërkuar ato. Ndërsa për 3 mujorin e parë të 2019-ës janë gjithsej 37 kërkesa për të kaluarën etike”, thuhet në përgjigjen e zyrës për informim të Odës së Mjekëve të Kosovës.
Kjo situatë po shihet si alarmante nga kryetari i Federatës së Sindikatave të Shëndetësisë, ‘për momentin nuk kemi statistika, por sa mund të them unë është, prej takimit tim të fundit në Bruksel, shifrat janë alarmante’, tha Blerim Syla.
Mirëpo në gjithë këtë valë të ikjes sipas tij, kalimi i ligjeve për paga, situata ka nisur të stabilizohet.
Ndërkaq, këshilltari politik i ministrit Ismaili, Albatrit Matoshi ka thënë se orientimet kryesore të MSH-së janë përmirësimi i kushteve dhe krijimi i mundësive për edukim profesional për të gjitha kuadrot mjekësore.
Gjermania është vendi numër një që po kërkon punëtorë shëndetësorë nga jashtë, ku bën pjesë edhe Kosova. Me ligjin e ri për Pagat, mjekët specialist tani marrin 1195 euro, ndërsa infermierët nga 537 në 525 euro./Lajmi.net/