Dr. Nysret Hajrullahu është zgjedhur drejtor i Spitalit të Gjilanit. Në zgjedhjet e kaluara parlamentare, ai ishte mobilizuar për të përkrahur Partinë Demokratike të Kosovës
Kanë përfunduar procedurat për zgjedhjen e drejtorit të Spitalit të Përgjithshëm të Gjilanit. Për këtë pozitë kanë konkurruar gjashtë kandidatë, katër të brendshëm dhe dy nga jashtë, shkruan Gazeta Shneta.
Dr. Nysret Hajrullahu ka dalë fitues ndaj kundër kandidatëve Enver Murtezi, Ukshin Ismajli, Gëzim Shala, Agron Leka dhe Ardian Foniqi.
Hajrullahu, tani drejtor i Spitalit, më parë ka qenë drejtor Klinik i këtij institucioni.
Por përveç profesionit të tij, ai është marrë edhe me politikë. Të paktën në zgjedhjet e 2014-tës ai ka përkrahur fuqishëm Partinë Demokratike të Kosovës.
Madje ishte angazhuar edhe të mblidhte mantelbardhët për tubime të PDK-së, për të promovuar “Misionin e Ri” të asaj kohe.
“Të nderuar punëtorë të shëndetësisë, ju falenderoj që sot jeni me ne. Ne sot ju kemi ftu që të ju shpalosim programin për ‘misionin e ri’. Mision i cili që nga 9 qershori do të filloj të realizohet andaj faleminderit që jeni sot me ne”, kishte deklaruar Hajrullahu në një tubim të mbajtur gjatë fushatës zgjedhore në qershor të vitit 2014.
Spitali i Gjilanit është në kuadër të Shërbimit Spitalor Klinik Universitar të Kosovës. Kujtojmë se ministria e Shëndetësisë udhëhiqet nga PDK me ministër Uran Ismajlin.
Kjo parti njihet për ndikimin në institucionet shëndetësore. Po në vitin 2014, PDK kishte rehatuar dajën e Adem Grabovcit, Curr Gjocaj, në pozitën e drejtorit të përgjithshëm të SHSKUK-së. /Gazeta Shneta/