Shumica e rasteve në Europë janë raportuar tek persona që kishin udhëtuar drejt vendeve afrikane ku ka shpërthime aktive të mpox-it.
Mbretëria e Bashkuar ka identifikuar një tjetër rast të një nënvarianti të ri dhe ngjitës të virusit mpox, duke u bërë shteti më i fundit europian që raporton një infeksion, shkruan burimi Euronews Health përcjell Gazeta Shneta.
Ky nënvariant i ri ka infektuar mijëra njerëz në Afrikën Qendrore që prej shfaqjes së tij në Republikën Demokratike të Kongos (RDK) në vitin 2023.
Ekzistojnë dy nënlloje të virusit mpox. Kladi II, që është endemik në Afrikën Perëndimore, shkaktoi shpërthimin global që vuri në alarm autoritetet shëndetësore në Europë dhe Amerikën e Veriut në vitin 2022. Ky variant vazhdon të qarkullojë ende, në nivele të ulëta.
Ndërkohë, kladi I, që është endemik në Afrikën Qendrore, besohet se shkakton forma më të rënda të sëmundjes dhe një rrezik më të lartë për vdekje.
Një nënvariant i kladi I, i quajtur kladi Ib, u identifikua për herë të parë në RDK në shtator 2023 dhe që atëherë është përhapur gjerësisht në rajon, sidomos në Burundi dhe Ugandë.
Si përhapet mpox?
Shumë gjëra ende nuk dihen për ashpërsinë e mpox-it të shkaktuar nga kladi Ib, por duket se ky variant përhapet më lehtë dhe po shkakton më shumë sëmundje tek fëmijët.
Mpox përhapet përmes kontaktit të afërt lëkurë më lëkurë dhe mund të shkaktojë skuqje në lëkurë, dhimbje koke, temperaturë, ethe, ënjtje të gjëndrave limfatike dhe simptoma respiratore.
Organizata Botërore e Shëndetësisë (OBSH) e shpalli shpërthimin e mpox-it në Afrikë si emergjencë globale të shëndetit publik në gusht 2024. Në atë kohë, autoritetet europiane paralajmëruan se pritej që raste të reja të shfaqeshin edhe në Europë, megjithatë rreziku për publikun mbetet i ulët.
Jashtë Afrikës, ky nënvariant i ri është zbuluar në pesë vende europiane si dhe në SHBA, Kanada, Brazil, Kinë, Indi, Tajlandë, Oman, Pakistan, Katar dhe Emiratet e Bashkuara Arabe (EBA).
Ku është zbuluar deri tani mpox kladi Ib në Europë?
Mbretëria e Bashkuar
Shumica e 11 rasteve në MB janë të lidhura me udhëtime. Por rasti më i fundit, i raportuar në prill, ishte një person që nuk kishte udhëtuar dhe nuk kishte lidhje me raste të tjera. Autoritetet thanë se nuk janë identifikuar raste të tjera në kontaktet e afërta dhe rreziku për publikun mbetet i ulët.
Rasti i parë ishte në tetor 2024, ku një person u sëmur pas kthimit nga Afrika dhe infektoi tre anëtarë të familjes. Qeveria ka blerë mbi 150,000 doza të vaksinës mpox dhe ka hapur qendra vaksinimi në të gjithë Anglinë.
Gjermania
Gjermania ka raportuar tetë raste, rasti i fundit në shkurt. Rasti i parë ishte në tetor dhe pesë raste të tjera në dhjetor. Rasti fillestar i dhjetorit ishte një person që kishte udhëtuar në zonat e shpërthimit dhe më pas infektoi familjarët, përfshirë fëmijë që nuk kishin udhëtuar.
Belgjika
Belgjika ka identifikuar pesë raste. Rasti i parë ishte në dhjetor dhe përfshinte një person të infektuar që kishte udhëtuar dhe një fëmijë. Më pas, u raportuan edhe raste të tjera: një në janar dhe dy në shkurt.
Franca
Në janar, autoritetet franceze raportuan një rast në rajonin e Bretanjës, pas kontaktit të ngushtë me dy persona që kishin ardhur nga Afrika Qendrore. Një tjetër rast u raportua në shkurt.
Suedia
Suedia ishte vendi i parë jashtë Afrikës që raportoi një rast të kladi Ib në gusht 2024, pasi një pacient kërkoi ndihmë në Stokholm pas infektimit në Afrikë. Mbetet i vetmi rast në vend.
Irlanda
Në shkurt, Irlanda zbuloi një rast të kladi Ia (jo Ib), por gjithsesi variant shqetësues. Personi ishte kthyer nga RDK dhe u shtrua në spital në Dublin. Autoritetet thanë se rreziku për publikun ishte i ulët. /Gazeta Shneta/