Numri i rasteve pozitive me coronavirus tash e disa ditë është rritur dukshëm ndërsa në spitale janë të shtrirë 25 pacientë të infektuar me COVID-19.
Në anën tjetër, Ministria e Shëndetësisë thotë se Instituti Kombëtar i Shëndetësisë Publike në vazhdimsi analizon të dhënat në vendin tonë si dhe në vendet tjera, me fokus të veçantë vendet e rajonit si dhe shtetet nga vijnë mërgata.
Të pyetur nga Gazeta Shneta nëse do të ketë ndryshim eventual të masave kundër COVID-19, ata thonë se masat do të dalin sipas rekomandimeve të ekspertëve.
“Ndryshimi eventual i masave do të dal nga rekomandimet e ekspertëve. Masat aktuale në fuqi, rekomandojnë bartjen e maskës në mjedise të mbyllura dhe krahas kësaj inkurajohet vaksinimi”, thotë MSh në një përgjigje për Gazetën.
MSh po ashtu thekson se të gjitha trupat relevante janë në gatishmëri për të reaguar ndaj COVID-19 dhe janë në konsultime të vazhdueshme.
“Sipas nevojës do të thirret edhe trupi këshilldhënës për COVID-19 që të mbajë së shpejti mbledhjen e radhës”, thekson ministria.
Sipas raportit 24 orësh të ministrisë nga 1 mijë e 165 testime të bëra në Institutin Kombëtar të Shëndetësisë Publike 341 kanë rezultuar pozitive me COVID-19 ndërsa gjatë kësaj periudhe janë dhënë vetëm 78 vaksinave anti-COVID.
Deri më tani janë administruar mbi 1,8 milion doza të vaksinave kundër coronavirusit.
Aktualisht në nivel vendi janë 1 mijë e 521 raste aktive me SARS-CoV-2. /Gazeta Shneta/