Në shënim të Ditës Botërore të Tuberkulozit, Ministria e Shëndetësisë (MSh), në bashkëpunim me Institutin Kombëtar të Shëndetësisë Publike të Kosovës (IKShPK), organizoi një tryezë të rrumbullakët për të theksuar rëndësinë e parandalimit, diagnostikimit dhe trajtimit të kësaj sëmundjeje.
Sipas një njoftimi zyrtar të MSh-së, me rastin e Ditës Botërore të Tuberkulozit është organizuar një tryezë e përbashkët, ku u theksua rëndësia e parandalimit, diagnostikimit të hershëm dhe trajtimit të sëmundjes, transmeton Gazeta Shneta.
Zëvendësministri i Shëndetësisë, Arsim Berisha deklaroi se tuberkulozi mbetet sfidë në Kosovë, por theksoi përparimet e arritura falë investimeve në kapacitetet diagnostikuese, trajtimit falas dhe rritjes së vetëdijes për diagnostikim të hershëm.
Ai bëri të ditur se është avancuar “Sistemi Elektronik për Mbikëqyrjen e Sëmundjeve Ngjitëse”, duke mundësuar raportim në kohë reale të rasteve me tuberkuloz.
Sipas tij, që nga viti 2017 janë siguruar barna antituberkulare në vlerë rreth 800 mijë euro, ndërsa Kosova ka dhuruar 35 mijë tableta për Shqipërinë në kuadër të bashkëpunimit ndërshtetëror.
Drejtore e Departamentit të Shërbimeve Shëndetësore dhe Shëndetit Publik në MSh, Merita Vuthaj theksoi se do të vazhdojë hartimi dhe monitorimi i politikave për forcimin e diagnostikimit dhe rritjen e qasjes në trajtim cilësor.
Ndërkohë, drejtorja e IKShPK-së, Ardita Baraku theksoi se shërbimet për tuberkulozin janë falas dhe të qasshme për të gjithë qytetarët, duke përfshirë vaksinimin dhe metodat moderne diagnostikuese.
Kryetari i Shoqatës së Pulmologëve të Kosovës, Skender Bacaj, theksoi rëndësinë e rolit të profesionistëve shëndetësorë në diagnostikimin dhe trajtimin e hershëm të sëmundjes. Ai gjithashtu theksoi përmirësimin e situatës epidemiologjike, duke bërë një krahasim pozitiv të incidencës së tuberkulozit nga viti 2000 e deri më sot.
Teksa, përfaqësuesi i projektit për tuberkuloz nga Fondi për Zhvillim Komunitar (CDF), Dr. Lulzim Çela, u shpreh i kënaqur për mbështetjen e këtij aktiviteti, duke theksuar përkushtimin e organizatës në luftimin e tuberkulozit.
Njoftimi i plotë: